pune accident news, Pune Navale Bridge : नवले पुलाजवळ अपघातांचं सत्र सुरुच; टँकर चालकाचे नियंत्रण सुटल्याने वाहनांना धडक – series of accidents continue near navale bridge the tanker driver lost control and hit the vehicles

पुणे : बंगळुरू महामार्गावरील नवले पुल परिसरात अपघातांची मालिका सुरूच असून आज शनिवारी दुपारी एक वाजण्याच्या सुमारास एका टँकर चालकाचे वाहनावरील नियंत्रण सुटल्याने तीन वाहनांना पाठीमागून धडक दिली. सुदैवाने या अपघातात कोणतीही जीवितहानी झाली नसली तरी यातील दोन चार चाकीचे मात्र मोठ्या प्रमाणात नुकसान झाले असून एका टेम्पो ट्रॅव्हलरचे किरकोळ नुकसान झाले आहे.

अपघातानंतर टँकरचालक टँकरसह पळून जात असताना नागरिकांनी त्याला पकडून पोलिसांच्या ताब्यात दिले आहे. घटनेची माहिती मिळताच सिंहगड रस्ता पोलीस ठाण्याचे पोलीस घटनास्थळी पोहचले आहेत. गेल्या रविवारपासून या परिसरात अपघातांची मालिका सुरू असून रविवारी त्याच परिसरात तीन वेगवेगळ्या ठिकाणी अपघात होऊन १३ प्रवासी जखमी झाले होते. तर एका दुचाकीस्वाराला आपला प्राण गमवावा लागला होता. मंगळवारी दोन अपघात झाले होते. यात ५ वाहनांचे नुकसान झाले होते.

Shinde Camp: शिंदेंच्या गुवाहाटी दौऱ्याला पाच आमदारांची नाराजीमुळे दांडी? अब्दुल सत्तार स्पष्टच म्हणाले…
काही दिवसांपूर्वी, साताराहून पुण्याच्या दिशेने येणारा ट्रक कात्रजच्या नवीन बोगद्यातून नवले पुलाच्या दिशेने येत असताना या ट्रकवरचे ट्रक चालकाचे नियंत्रण सुटले आणि ट्रक समोरील वाहनांना उडवत पुढे गेला. या अपघातामुळे महामार्गावर मोठ्या प्रमाणात तेल गळती झाल्याने वाहतुक बराच वेळ थांबवावी लागली. पुण्यातील नवले पुल हा अपघातांचं केंद्र बनला असून अनेक निष्पापांना प्राण गमवावे लागले आहेत. कारण आहे या ठिकाणी चुकलेली रस्त्याची रचना. तीव्र उतार आणि वळणे एकत्र झाल्याने पुण्यातील नवले पुलाचा भागा अपघातांचा हॉटस्पॉट बनला आहे.

प्रवाशांमध्ये जनजागृती व्हावी यासाठी आणि प्रशासनाला जागे करण्यासाठी राष्ट्रवादीकडून नऱ्हे सेल्फी पॉइंट येथे “सावधान, पुढे नवले पूल आहे” अशा आशयाचे बॅनर लावण्यात आले आहेत. राष्ट्रवादीचे सरचिटणीस भूपेंद्र मोरे यांच्या वतीने हे बॅनर लावण्यात आले आहे. या फ्लेक्सवर तीव्र स्वरूपाचा उतार आणि त्याबरोबरीने कावळ्याचा देखील फोटो दाखवण्यात आला आहे. यावर ‘सावधान… पुढे नवले ब्रीज आहे’ अशी रचना केली असून जांभुळवाडी तलावापासून ते नऱ्हे येथील सेल्फी पॉईंट पर्यंत हे फ्लेक्स लावण्यात आले आहेत. सोशल मीडियावर या बॅनरची चांगलीच चर्चा रंगू लागली आहे.