बुलढाणा : शिवसेना उद्धव बाळासाहेब ठाकरे या पक्षाचे प्रमुख आणि राज्याचे माजी मुख्यमंत्री उद्धव ठाकरे यांनी आज बुलढाणा जिल्ह्यातील चिखली येथील शेतकरी मेळाव्यात शिंदे-फडणवीस सरकारवर घणाघाती हल्ला चढवला. राज्यपाल भगतसिंह कोश्यारी यांचं वादग्रस्त, मुख्यमंत्री एकनाथ शिंदे यांचा गुवाहाटी दौरा आणि शेतकरी प्रश्नावरून उद्धव ठाकरे यांनी खरमरीत शब्दांत राज्य सरकारला लक्ष्य केलं. यावेळी उद्धव यांनी भाजप नेते आणि राज्याचे उपमुख्यमंत्री देवेंद्र फडणवीस यांची एक जुनी ऑडिओ क्लिपही उपस्थितांसमोर ऐकवली आहे.

उद्धव ठाकरे हे मुख्यमंत्रिपदी असताना देवेंद्र फडणवीस यांनी वीजबिल वसुलीच्या मुद्द्यावरून महाविकास आघाडीवर जोरदार निशाणा साधला होता. तसंच मध्य प्रदेश सरकारने जशी तेथील शेतकऱ्यांना वीजबिलात माफी दिली आहे, तशी महाराष्ट्रातही देण्यात यावी, असं म्हणत फडणवीस यांनी तत्कालीन सरकारविरोधात रान पेटवलं होतं. मात्र आता भाजप सत्तेत असतानाही आक्रमकपणे शेतकऱ्यांकडून वीजबिल वसुली करण्यात येत असल्याने उद्धव ठाकरेंनी संताप व्यक्त केला. फडणवीस यांच्या जुन्या वक्तव्याची ऑडिओ क्लिप चिखलीतील सभेत ऐकवत उद्धव ठाकरे यांनी देवेंद्र फडणवीसांना आपल्या भूमिकेची आठवण करून दिली. तसंच आता राज्यात तुमचंच सरकार आहे, आम्ही शेतकऱ्यांची कर्जमाफी आहे, तुम्ही वीजबिल माफी कराच, असं आवाहन उद्धव यांनी केलं आहे.

ताईंनी मोदींसोबतचा तो फोटो छापून आणला, ईडी सीबीआय कारवाईचं धाडस करेल का? ठाकरेंचा सवाल

एकनाथ शिंदे, हेलिकॉप्टर आणि शेतकरी

एकनाथ शिंदे हे काही दिवसांपूर्वी आपल्या दरे या सातारा जिल्ह्यातील मूळ गावी जाऊन शेतात रमले होते. याबाबतचे व्हिडिओ सोशल मीडियावर व्हायरलही झाले होते. याच व्हिडिओंचा दाखला देत उद्धव ठाकरेंनी मुख्यमंत्र्यांवर टीकेचा आसूड ओढला आहे. ‘आपलं सरकार गेल्यानं शेतकऱ्याचं प्रचंड नुकसान झालं आहे. खोटं बोलत रेटून राज्य चालवलं जात आहे. मुख्यमंत्री हेलिकॉप्टरने शेतात जातो. मात्र माझ्या शेतकऱ्याच्या भविष्याचं काय? हेलिकॉप्टरमधून शेतात जाणारा दुसरा मुख्यमंत्री दाखवा आणि १ लाख रुपये मिळवा, असं बक्षीस आपल्याला ठेवावं लागेल. सध्या राज्यात शेतकऱ्यांची थट्टा चालली आहे,’ असा हल्लाबोल उद्धव ठाकरे यांनी केला आहे.

दरम्यान, शेतकरी प्रश्नावरून उद्धव ठाकरे यांनी केलेल्या या टीकेला शिंद-फडणवीस सरकारकडून कसं प्रत्युत्तर दिलं जातं, हे पाहणं औत्सुक्याचं ठरणार आहे.

LEAVE A REPLY

Please enter your comment!
Please enter your name here