शिवसेना पक्षप्रमुख उद्धव ठाकरेंनी ज्या चिखलीत सभा घेतली, तिथले आमदार-खासदार त्यांना सोडून गेले होते, पण ठाकरेंना त्याचा काडीमात्र फरक पडला नाही. उलट अधिक त्वेषाने ते भाजप शिंदे गटावर तुटून पडले. एकनाथ शिंदे यांचं भविष्य, भावना गवळींची राखी आणि देवेंद्र फडणवीस यांची लाज काढत उद्धव ठाकरेंनी घणाघाती भाषण केलं. शेतकऱ्यांच्या मुद्द्यावरुन त्यांनी राज्य सरकारला लक्ष्य केलं तर शिवसेना फुटीवरुन बंडखोर आमदार-खासदारांना इशारेही दिले.

 

Shivsena Uddhav Thackeray Buldhana Chikhali Shetkari Melava Prataprao Jadhav Sanjay Raymulkar Sanjay Gaikwad Shinde camp
प्रतापराव जाधव, संजय गायकवाड, संजय रायमुलकर आणि उद्धव ठाकरे
बुलढाणा : एकनाथ शिंदे यांचं भविष्य, भावना गवळींची राखी आणि देवेंद्र फडणवीस यांची लाज काढत उद्धव ठाकरेंनी आपल्या महाराष्ट्र दौऱ्याचं रणशिंग फुंकलं. ज्या चिखलीत त्यांनी सभा घेतली, तिथले आमदार-खासदार त्यांना सोडून गेले होते, पण ठाकरेंना त्याचा काडीमात्र फरक पडला नाही. उलट अधिक त्वेषाने ते भाजप शिंदे गटावर तुटून पडले. गेलेल्यांचा मुखवटा खोटा होता. आता जे राहिलेत ते माझे सैनिक आहेत, असं म्हणत त्यांनी सोबतीच्या साथीदारांचा शूरवीर म्हणत उल्लेख केला. त्यांच्या सभेला तुफान प्रतिसाद मिळाला. याचमुळे शिंदे गटातले एक खासदार आणि २ आमदारांच्या पोटात गोळा आला. ठाकरेंची एक सभा तीन नेत्यांवर कशी भारी पडली, वाचा…

बुलडाण्याचे खासदार प्रतापराव जाधवांनी एकनाथ शिंदेंना साथ दिलीये. मेहकरचे आमदार संजय रायमुलकरांनी शिंदे गटात प्रवेश केलाय. तर बुलडाणा शहरचे आमदार संजय गायकवाड आणि सिंदखेडराजाचे माजी आमदार शशिकांत खेडेकर यांनीही एकनाथ शिंदे यांचे हात बळकट करण्याचा दोन महिन्यांपूर्वी निर्णय घेतला. त्यांच्याच बालेकिल्ल्यात जाऊन ठाकरेंनी सभा घेतली. आमदार खासदार शिंदे गटात गेल्याने ठाकरेंच्या सभेला प्रतिसाद कसा मिळतो, याकडे राज्याचं लक्ष लागलं होतं. पण ठाकरेंना एवढा मोठा आणि जबरदस्त प्रतिसाद मिळाला की शिंदे गटात गेलेल्या नेत्यांसाठी हे सारं अनपेक्षित होतं.

  • बुलडाणा जिल्हा हा शिवसेनेचा बालेकिल्ला
  • प्रतापराव जाधव, संजय रायमुलकर, संजय गायकवाड यांचा बालेकिल्ला
  • पण तिन्ही नेते शिंदे गटात गेल्याने सेनेचा गड ढासळल्याची चर्चा
  • पण असं असलं तरी ठाकरेंच्या सभेत कुठेच तसं चित्र जाणवलं नाही
  • आमदार-खासदार शिंदेंसोबत पण निष्ठावंत शिवसैनिक ठाकरेंसोबत असल्याचं चित्र
  • ठाकरेंच्या सभेला हजारो शिवसैनिकांच्या उपस्थितीने हेच चित्र अधोरेखित

बुलढाण्याचे खासदार प्रतापराव जाधव यांना शिवसेनेने भरुनभरुन दिलं. त्यांना तीन वेळा खासदार केलं. कुठल्याही अडअडचणीच्या काळात ठाकरे कुटुंब जाधवांच्या मागे खंबीरपणे उभा राहिलं, पण शिवसेनेत उभी फूट पडली आणि जाधवांनी पुढचा मागचा विचार न करता शिंदेंना साथ द्यायचा निर्णय घेतला. तत्पूर्वी आमदार संजय रायमुलकर, संजय गायकवाड यांनीही ठाकरेंवर आरोप करत त्यांची साथ सोडली आणि शिंदेंना पाठिंबा देण्यासाठी गुवाहाटी गाठली..

  • प्रतापराव जाधव, संजय गायकवाड आणि संजय रायमुलकर बुलडाण्याचे त्रिदेव
  • पण त्यांना घरी बसवून दुसऱ्या फळीतील शिवसैनिकांना मैदानात उतरविण्याचा ठाकरेंचा निश्चय
  • गेले ते गद्दार, राहिलेले निष्ठावंत; गद्दारांना गाडूया, पुन्हा नव्या सैनिकाला निवडून देऊन मशाली पेटवूया, ठाकरेंची घोषणा

आमदार खासदार नसतानाही, ठाकरेंच्या सभेला मोठ्या प्रमाणात शेतकऱ्यांनी गर्दी केली. शिवसेनेच्या बुलढाण्यातील त्रिदेवांनी ठाकरेंची साथ सोडल्यावर बुलढाण्याची सभा कशी होणार? मंचावर कोण असणार? शिवसैनिकांची उपस्थिती असणार का? असे प्रश्न होते.. पण ठाकरेंनी या सभेत सगळ्या प्रश्नांची उत्तरे दिली. हजारो शिवसैनिकांची उपस्थितीच सगळं काही सांगून गेली. आमदार खासदार नसतानाही, ठाकरेंच्या सभेला मोठ्या प्रमाणात प्रतिसाद मिळाला. मुंबईबाहेरची पहिलीच सभा उद्धव ठाकरे यांनी बुलढाण्यात घेतल्यामुळे खासदार जाधव, आमदार संजय रायमुलकर आणि संजय गायकवाड यांच्यापुढील अडचणी नक्कीच वाढल्या आहेत, अशी जिल्ह्यात चर्चा आहे.

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.

LEAVE A REPLY

Please enter your comment!
Please enter your name here