hingoli crime news, क्षुल्लक कारणावरुन सरकारी कर्मचाऱ्याला घरात कोंडून बेदम मारहाण; संतापजनक घटनेचा Video समोर – sengaon taluka of hingoli teacher was locked inside his house and beaten up for a trivial reason

हिंगोली : हिंगोली जिल्ह्यातल्या सेनगाव तालुक्यातील खडकी येथे खड्डा खोदण्याच्या कारणावरून जिल्हा परिषद कनिष्ठ सहाय्यक शिक्षक विभागातील एका कर्मचाऱ्याला घरात कोंडून लोखंडी रॉडने मारहाण केल्याची घटना घडली आहे. या प्रकरणी रामकिशन तुळशीराम हराळ यांच्या फिर्यादीवरून राजाराम अश्रुबा गायकवाड, कमलाबाई राजाराम गायकवाड, चंद्रमुनी राजाराम गायकवाड यांच्याविरुद्ध सेनगाव पोलीस ठाण्यात गुन्हा दाखल केला आहे. बैलगाडी जाते त्या रस्त्यावरुन आणि खड्डा खोदण्याच्या कारणावरून सदरील आरोपीने लोखंडी रॉड आणि कुऱ्हाडीच्या तुंब्याने बेदम मारहाण करत डांबून ठेवत जखमी केले.

विशेष म्हणजे या प्रकरणी सध्या सेनगाव पोलीस ठाण्यामध्ये परस्परविरुद्ध गुन्हे दाखल झाले आहेत. तर पहिल्या प्रकरणात मारहाण झालेल्या व डांबून ठेवलेल्या रामकिशन तुळशीराम हराळ यांच्या विरुद्ध सुद्धा गुन्हा दाखल झाला आहे. या फिर्यादीमध्ये असे म्हटले आहे की, फिर्यादी कमलाबाई गायकवाड यांना जातीवाचक शिवीगाळ करून व संडासचा खड्डा का खोदता या कारणावरून कुटुंबातील काही सदस्यांना मारहाण केल्याचा आरोप करण्यात आला आहे. त्याचबरोबर या कर्मचाऱ्याने घरात घुसून मारहाण केल्याचा आरोप पोलिसांना दिलेल्या तक्रारीत केला आहे.

उद्धव ठाकरेंच्या बुलढाण्यातील एका सभेने ३ नेत्यांचा ‘करेक्ट कार्यक्रम’ होणार?
सध्या या प्रकरणी परस्पर विरुद्ध गुन्हे दाखल झालेले असून पोलीस या प्रकरणी अधिक तपास करत आहेत. डांबून ठेवलेल्या रामकिशन हराळ यांची पोलिसांच्या मदतीने सुखरूप सुटका करण्यात आल्याची माहिती पोलिसांनी दिली आहे. घडलेल्या सर्व प्रकारामुळे सेनगाव तालुक्यातल्या खडकी गावांमध्ये एकच खळबळ उडाली होती. हे प्रकरण नवीनच असताना असे अनेक प्रकार आतापर्यंत किरकोळ कारणावरून धक्कादायक घटना घडल्या आहेत. त्यामुळे पोलिसांनी अशा लोकांना शांत राहण्याचे आवाहन केले आहे.