मुंबई : ‘लष्कर-ए-तोयबा’मध्ये भारताविरोधातील कारवाया आणि अफगाणिस्तानातील कारवाया, तसेच यापैकी कोणता जिहाद मोठा, यावरून अंतर्गत संघर्ष सुरू झाला होता व त्यांना एकत्र आणण्यासाठी भारतात काहीतरी भव्यदिव्य कारवाई घडविणे ‘आयएसआय’ला भाग होते. मुंबईवरील दहशतवादी हल्ला त्यासाठीच घडवून आणला गेला, असा गौप्यस्फोट राष्ट्रीय सुरक्षा परिषद सचिवालयात कार्य केलेले अतिरिक्त सचिव व जम्मू-काश्मीरचे आयपीएस अधिकारी शिवमुरारी सहाय यांनी सुरक्षाविषयक परिषदेत केला.

‘ब्रह्मा रिसर्च फाऊंडेशन’ या सुरक्षाविषयक विचारमंचातर्फे २६ नोव्हेंबरच्या मुंबई हल्ल्याच्या निमित्ताने आयोजित केलेल्या राष्ट्रीय सुरक्षा परिषदेत सहाय यांच्यासह विविध सुरक्षातज्ज्ञांनी आपले विवेचन सादर केले. यावेळी सहाय म्हणाले की, ‘मुंबई हल्ल्याचा कट शिजविताना डेव्हिड हेडलीने अत्यंत महत्त्वाची भूमिका पार पाडली व त्याला तहव्वूर राणा याचेही मोठे पाठबळ होते. हेडलीने एकूण २६९ दिवस मुक्काम केला व भारतात नऊ दौरे केले. त्यात बंगळुरू, हैदराबाद, कोलकाता, दिल्ली, मुंबई या शहरांना भेटी दिल्या. हल्ल्यादरम्यान दहशतवाद्यांनी दिवसा मुंबईत प्रवेश केला असता, तर हल्ल्याची लक्ष्ये वेगळी दिसली असती. इतके काटेकोर नियोजन होते. हा संपूर्ण कट अमली पदार्थांच्या तस्करीतील व्यवहारांवर बेतलेला होता. इटली हे या नियोजनातील महत्त्वाचे केंद्र होते.’

या परिषदेचे उद्घाटन भारतीय संरक्षण मंत्रालयास प्रधान सल्लागार असलेले व लष्करात ४३ वर्षे सेवा देऊन निवृत्त झालेले लेफ्टनंट जनरल विनोद खंडारे यांनी केले. अध्यक्षीय भाषणात त्यांनी भारतापुढील भावी दहशतवादी आव्हानांची माहिती दिली. दहशतवाद आता नव्या स्वरूपात समोर येणार असून सायबरविश्व, अंतराळविश्व आणि माहितीचे विश्व अशा तिन्ही क्षेत्रांत मोठे आव्हान उभे करील. ही आव्हाने पेलण्यासाठी सुरक्षा आणि आर्थिकवृद्धी या दोन्ही आघाड्यांवर आपल्याला बाजी मारावी लागेल. त्याचप्रमाणे राष्ट्रीय सुरक्षा ही सर्वसमावेशक असली पाहिजे. त्यात आर्थिक धोरणे, पर्यावरण, बुद्धिसंपदा व स्वामित्त्व, पर्यावरण अशा विविध क्षेत्रांचा त्यात समावेश असेल’, असे ते म्हणाले.

मुंबईच्या शिरपेचात ‘युनेस्को’चा तुरा; छत्रपती शिवाजी महाराज वस्तुसंग्रहालयासह ‘या’ स्थानकाला पुरस्कार

निवृत्त एअरमार्शल राजेश कुमार यांनी हवाई दलाने दहशतवादाचा प्रतिकार करण्यासाठी क्षमतावृद्धी कशी केली, त्याचे दाखले दिले. हेलिकॉप्टरचा दहशतवाद्यांविरोधातील वापर, तसेच उरीनंतर झालेले सर्जिकल स्ट्राइक व पुलावामा हल्ल्यानंतर झालेला बालाकोट हवाई प्रतिकार हे पाकिस्तानसाठी अनाकलनीय व धडकी भरविणारे ठरले, असे त्यांनी सांगितले.

आयपीएस राकेश अस्थाना यांनी गुप्तवार्ता आदानप्रदानात कसा फरक पडला ते सांगितले. तर, माजी पोलिस महासंचलक डी. शिवानंदन यांनी मुंबई हल्ल्याची सचित्र माहिती दिली व केवळ वर्दीतील हुतात्माच नव्हे, तर १९९३पासून आजवर बॉम्बस्फोटांमध्ये नाहक जीव गमवावा लागलेल्या सर्वच नागरिकांचे स्मरण व्हायला हवे, अशी अपेक्षाही त्यांनी व्यक्त केली.

ब्रह्मा रिसर्च फाऊंडेशनचे संस्थापक प्रा. विजय पागे यांनी या चर्चासत्रांचे प्रास्तविक केले भारतीय नौदलातील निवृत्त व्हाइसअडमिरल अभय कर्वे, भारतीय तटरक्षक दलाचे निवृत्त अतिरिक्त महासंचालक विजय चाफेकर, इस्रायल नौदलाचे निवृत्त व्हाइसअडमिरल डेव्हिड बेन-बाशात यांच्यासह विविध मान्यवर चर्चासत्रात सहभागी झाले होते. आमदार आशीष शेलार यांनीही चर्चासत्राच्या प्रारंभी आपले विचार मांडले.

LEAVE A REPLY

Please enter your comment!
Please enter your name here