जगविख्यात कुस्तीपटू सादिक पंजाबी यांचे निधन

म. टा. प्रतिनिधी, कोल्हापूर
एकेकाळी कोल्हापुरातील तालमीत कुस्तीचे धडे घेतलेला आणि अनेक कुस्त्या मारत कुस्ती शौकिनात वेगळे स्थान निर्माण करणाऱ्या पैलवान सादिक पंजाबी यांचे लाहोर येथे वृध्दापकाळाने निधन झाले. निधनासमयी ते ८५ वर्षाचे होते. कोल्हापूरशी अतिशय जिव्हाळ्याचा संबंध असणाऱ्या या पैलवानाने भारत आणि पाकिस्तानात अनेकांना चितपट केले होते.

कोल्हापुरातील गंगावेश, काळा इमाम, शाहू विजयी अशा अनेक तालमीत सराव करणाऱ्या सादिक पंजाबीने श्रीपती खंचनाळे, चंदगीराम, गणपतराव आंदळकर अशा अनेक महान मल्लांना चितपट केले. मारूती माने आणि दादू चौगले यांच्याकडून मात्र त्याला हार पत्करावी लागली होती. साठ ते सत्तर या दशकात त्याने भारत आणि पाकिस्तानात अनेक कुस्त्या खेळत आपले नाव कमवले. कोल्हापुरातील ऐतिहासिक खासबाग मैदानात झालेली पंजाबी व गोगा यांच्यातील कुस्ती त्याने मारली आणि तेव्हापासून तो कोल्हापूरकरांच्या गळ्यातील ताइत बनला होता. ही कुस्ती एक तास चालली होती. पंजाबीच्या निधनाचे वृत्त कोल्हापुरात कळताच कुस्ती शौकिनांवर शोककळा पसरली.