करोनापासून खेळाडूंना वाचवण्यासाठी राहुल द्रविड 'अशी' करणार मदत

सध्याच्या घडीला सर्वत्र करोनाचे संकट आहे. आता काही दिवसांन क्रिकेट सुरु करण्यासाठी बीसीसीआय प्रयत्नशील आहे. आयपीएल सप्टेंबरमध्ये रंगणार असली तरी त्यापूर्वी खेळाडूंना सराव करावा लागणार आहे. भारतीय क्रिकेटपटूंना करोनापासून वाचवण्यासाठी भारताचा माजी महान क्रिकेटपटू राहुल द्रविड आता मदत करणार असल्याचे समोर आले आहे.

करोनाची भिती ही खेळाडूंनाही आहे. कारण सराव करत असताना किंवा फिटनेससाठी व्यायाम करत असताना खेळाडू काही जणांच्या संपर्कात येऊ शकतात. त्यामुळे खेळाडूंनाही करोना होण्याची शक्यता आहे. खेळाडूंना सुरक्षित ठेवणे, ही बीसीसीआयची प्राथमिक जबाबदारी आहे. त्यासाठी आता बीसीसीआय राहुल द्रविडची मदत घेणार असल्याचे समोर आले आहे.

राहुल द्रविडने आतापर्यंत युवा क्रिकेटसाठी मोलाचे योगदान दिले आहे. त्याचबरोबर द्रविड सध्या बीसीसीआयच्या राष्ट्रीय क्रिकेट अकादमीचा संचालक आहे. त्यामुळे बीसीसीआयने द्रविडवर एक महत्वाची जबाबदारी सोपवल्याचे पाहायला मिळत आहे. भारतीय क्रिकेटपटू दुखापतग्रस्त झाले किंवा त्यांना कोणतीही मदत लागली, तर ते पहिल्यांदा राष्ट्रीय क्रिकेट अकादमीचे दार ठोठावत असतात. जर बीसीसीआयला क्रिकेट सुरु करायचे असेल तर त्यांना राष्ट्रीय क्रिकेट अकादमीशिवाय दुसरा पर्याय दिसत नाही. त्यामुळे खेळाडूंना करोनापासून वाचवण्यासाठी द्रविडची भूमिका महत्वाची असल्याचे म्हटले जात आहे.

राष्ट्रीय क्रिकेट अकादमीमध्ये खेळाडूंच्या सुरक्षेसाठी द्रविड तैनात असणार आहे. द्रविडबरोबर एक वैद्यकीय अधिकारी, एक स्वच्छता अधिकारी, बीसीसीआयचे काही व्यक्ती खेळाडूंच्या सुरक्षेची जबाबदारी घेणार आहेत. करोनाबाबत खेळाडूंना माहिती देणे, उपाय योजना काय करायच्या हे सांगणे, खेळाडूंना करोनापासून लांब ठेवणे आणि त्यांचे शारीरिक आणि मानसीक स्वास्थ सांभाळणे, यामध्ये द्रविडची महत्वाची भूमिका असणार असल्याचे आता समोर येत आहे.

क्रिकेटचा सराव सुरु करण्यापूर्वी राष्ट्रीय क्रिकेट अकादमीमधील सर्व कर्मचाऱ्यांची करोना चाचणी होणार आहे. त्यानंतर खेळाडूंचीही करोना चाचणी होणार आहे. सर्वांना हा नियम पाळावाच लागेल. सर्वांना याबाबतचे एक सहमती पत्र द्यावे लागणार आहे. त्यानंतर त्यांची करोना चाचणी होईल आणि त्यानंतरच ते काम करू शकतील.