'बीसीसीआयवर कोणतेही आर्थिक संकट आलेले नाही'

आयपीएल तोंडावर आलेली असताना चीनच्या विवो या कंपनीने बीसीसीआयबरोबराचा करार मोडीत काढला आहे. त्यामुळे आता एवढ्या टकमी वेळात प्रायोजक आणायचा कुठून हा मोठा प्रश्न बीसीसीआयला पडलेला आहे, असे म्हटले जात आहे. पण दुसरीकडे बीसीसीआयच्या एका अधिकाऱ्याने मात्र कोणतेही आर्थिक संकट आलेले नाही, असे म्हटलेले आहे.

बीसीसीआयच्या एका अधिकाऱ्यांनी सांगितले की, ” सध्याच्या घडीला बीसीसीआयवर कोणतेही आर्थिक संकट आलेले नाही आणि घाबरून जाण्याची तर अजिबातच गरज नाही. बीसीसीआयच्या आर्थिक स्थितीमध्ये कोणताही बदल झालेला नाही. त्याचबरोबर जर कोणाला बीसीसीआयवर आर्थिक संकट आले, असे वाटत असेल तर घाबरून जाऊन यामधून कोणताही मार्ग निघू शकत नाही.”

अधिक माहिती देताना बीसीसीआयच्या अधिकाऱ्यांनी सांगितले की, ” सध्याच्या घडीला बीसीसीआयमध्ये कोणताही बदल झालेला नाही. आम्ही समजू शकतो की, सध्याची परिस्थिती अशी आहे की कोणालाही आर्थिक फटका बसू शकतो. पण जर बीसीसीआयच्या दृष्टीकोनातून पाहिले तर आर्थिक संकटाची ही परिस्थिती नक्कीच नाही. कारण जेव्हा तुम्ही करार करत असता तेव्हा त्यामध्ये काही अटी असतात, त्यानुसारच तुम्हाला करार पुढे कायम ठेवायचा की मोडीत काढायचा, हे ठरवायचे असते. त्यानुसार बीसीसीआयवर कोणतेही आर्थिक संकट आलेले नाही.”

यापूर्वी पेप्सिको ही कंपनी बीसीसीआयला ३९६ कोटी रुपये वर्षांला देत होती. पण त्यानंतर चीनची विवो आणि आयपीएल यांच्यामध्ये २१९९ कोटी रुपयांचा पाच वर्षांसाठी करार झाला होता. त्यानुसार विवो दरवर्षी आयपीएलला ४४० कोटी रुपये देणार होती. हा करार २०१७मध्ये सुरु झाला होता. त्यामुळे आता या आयपीएलसाठी विवो कंपनी ४४० कोटी आयपीएलला देणार होती. पण यावर्षीच्या आयपीएलमध्ये विवो या कंपनीने आपला करार मोडीत काढला आहे. त्यामुळे आता बीसीसीआयलानवीन प्रायोजक काही दिवसांतच शोधावा लागणार असल्याचे म्हटले जात आहे.

आता आयपीएल तोंडवर आल्यावर विवोने आपण या वर्षी तरी आयपीएलला प्रायोजकत्व देऊ शकत नाही, असे म्हटल्याचे ऐकिवात आहे. त्यामुळे आता एवढ्या कमी कालावधी प्रायोजक नेमका कुठून आणायचा, हा प्रश्न बीसीसीआयला पडलेला आहे. यावेळी बीसीसीआयने काही पर्यायांवर विचार सुरु केला असल्याचे समजते आहे. यापूर्वी प्रायोजकत्व घेतलेल्या आणि यापूर्वी त्यासाठी उत्सुक असलेल्या कंपन्यांबरोबर बीसीसीआय बोलणी करत असल्याचे म्हटले जात आहे.पण कोणती कंपनी यासाठी तयार होणार, हे मात्र कोडे सुटलेले नाही.