जर क्रिकेटला नव्याने सुरुवात करायची असेल तर त्यासाठी सरकारची परवानगी आवश्यक आहे. गेल्या पाच महिन्यांपासून भारतातील क्रिकेट ठप्प आहे. आयपीएलही पुढे ढकलण्यात आले होते. बीसीसीआयने कंबर कसल्यामुळे आता आयपीएल खेळवण्यात येत आहे. आयपीएलसाठी बीसीसीआयला मोदी सरकारने परवानगी दिली आहे. पण महाराष्ट्र सरकारकडून मात्र अजूनही क्रिकेट संघटनेला उत्तर आले नसल्याचे पाहायला मिळत आहे. यामध्ये केंद्र आणि राज्य यांच्यातील सरकारमध्ये असलेले वातावरण कारणीभूत आहे का, याबाबत चाहत्यांमध्ये चर्चा सुरु आहे.
बीसीसीआयला युएईमध्ये आयपीएल खेळवणे सोपे नव्हते. त्यासाठी भारत सरकारची परवानगी महत्वाची होती. जर भारत सरकारने परवानगी दिली नसती तर युएईमध्ये आयपीएल खेळवले गेले नसते. पण भारता सरकारने मात्र बीसीसीआयला आयपीएल खेळवण्याची परवानगी दिली आहे. पण दुसरीकडे खेळाडूंसाठी क्रिकेट संघटनेने महाराष्ट्र सरकारला एक विनंती केली होती. पण ठाकरे सरकारने ही विनंती अजूनही मान्य केली नसल्याचे पाहायला मिळत आहे.
भारतीय खेळाडू आता आयपीएल खेळणार असल्याचे स्पष्ट झाले आहे. करोना चाचणी निगेटीव्ह आल्यावर त्यावर शिक्कामोर्तब होईल. पण खेळाडू थेट आयपीएल खेळायला जाऊ शकत नाही. कारण आयपीएल ही दोन महिन्यांची स्पर्धा आहे. त्यासाठी खेळाडूंना सराव आणि फिटनेस महत्वाचा आहे, यासाठीच महाराष्ट्र सरकारकडे विनंती करण्यात आली होती, पण त्याला अजूनही उत्तर मिळालेले नाही.
मुंबईतील श्रेयस अय्यर, पृथ्वी शॉ, अजिंक्य रहाणे, सूर्यकुमार यादव हे आयपीएलमधील महत्वाचे खेळाडू आहेत. या खेळाडूंना आयपीएल सुरु होण्यापूर्वी सराव करायची गरज आहे. त्यासाठी मुंबई क्रिकेट असोसिएशनने महाराष्ट्र सरकारकडे परवानगी मागितली होती. वांद्रे-कुर्ला येथील क्रीडा संकुलात खेळाडूंना इनडोअर सराव करायला परवानगी द्यावी, अशी विनंती करण्यात आली होती. याबाबत मुंबई क्रिकेट असोसिएशनचे अध्यक्ष विजय पाटील यांनी महाराष्ट्राचे मुख्यमंत्री उद्धव ठाकरे यांना पत्र लिहिले होते. पण अजूनही या पत्रावर उद्धव ठाकरे यांनी कोणतीही प्रतिक्रीया दिलेली नाही. त्यामुळे मुंबईतील खेळाडू अजूनही सरावापासून दूरच राहिलेले आहेत. अन्य राज्यांनी आपल्या खेळाडूंना सराव करण्याची परवानगी दिली आहे. पण महाराष्ट्र सरकारने अजून कोणतेही उत्तर याप्रश्नी दिलेले नाही.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
