कोहलीचा फिटनेस खेळाडूंमध्ये सर्वात चांगला असल्याचे म्हटले जाते. त्याचबरोबर आयपीएल ही जवळपास दोन महिने खेळवण्यात येणार आहे. त्यामुळे आयपीएलसाठी खेळाडूंना चांगला फिटनेस ठेवावा लागतो. आता कोहलीने आपल्या फिटनेसवर काम करायला सुरु केले आहे.
दुबईमधील एका हॉटेलमध्ये कोहली वास्तव्याला आहे. पण हॉटेलमधील व्यायामशाळा अजूनही सुरु झालेल्या नाहीत. त्यामुळे कोहलीला व्यायामशाळेत जाता आले नाही. पण कोहलीने त्याच्यावर एक उपाय शोधून काढला आहे. कोहली ज्या रुममध्ये थांबला आहे, त्यामध्ये एक मोठी बाल्कनी आहे. कोहलीने या बाल्कनीला आपली व्यायामशाळा बनवली आहे. या बाल्कनीमध्ये कोहली चांगलाच घाम गाळताना दिसत आहे. त्याचबरोबर कोहलीने काही सुरक्षेचे उपायही केलेले दिसत आहेत.
कोहली सध्या क्वारंटाईनमध्ये आहे आणि त्याच्या करोना चाचण्या झालेल्या नाहीत. त्यामुळे आता सर्वांनाच कोहलीच्या करोना चाचणीचाअहवाल नेमका काय येतो, याची उत्सुकता लागून राहीली आहे. कोहलीचा करोनाचा अहवाल निगेटीव्ह आला तरच त्याला मैदानात सराव करता येणार आहे.
आयपीएलसाठी सर्वात आधी दोन संघ युएईला रवाना झाले होते. यामध्ये किंग्ज इलेव्हन पंजाब आणि राजस्थान रॉयल्स या दोन संघांचा समावेश होता. या दोन संघांतील सर्व खेळाडूंना सहा दिवस क्वारंटाइन केले होते. या दोन्ही संघांतील खेळाडूंच्या तीन करोना चाचण्या झाल्या. या तिन्ही चाचण्यांमधील खेळाडूंचे करोना अहवाल निगेटीव्ह आले आहेत. त्यामुळे आयपीएलसाठी ही एक सकारात्मक गोष्ट असल्याचे म्हटले जात आहे.
किंग्ज इलेव्हन पंजाब आणि राजस्थान रॉयल्स या दोन्ही संघांतील खेळाडूंचे करोना अहवाल निगेटीव्ह आले आहेत. त्यामुळे आता त्यांना बायो-बबल सुरक्षेमध्ये ठेवण्यात येणार आहे. त्याचबरोबर किंग्ज इलेव्हन पंजाब आणि राजस्थान रॉयल्स या दोन्ही संघांतील खेळाडू आता सराव करू शकतात. युएईमध्ये जास्त उष्मा असल्यामुळे खेळाडूंनी सकाळी आणि संध्याकाळी सराव करायला पसंती दिली आहे.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
