पेटीएम फर्स्ट गेम्स यांनी आपल्या ट्विटरवर एक व्हिडीओ पोस्ट केला आहे. या व्हिडीओमध्ये सचिन आमचा सदिच्छादूत असल्याचे त्यांनी स्पष्टपणे सांगितले आहे. त्यानंतर अखिल भारतीय व्यापारी संघटनेने सचिनला एक पत्र लिहिले आहे. या पत्रामध्ये तू चीनबरोबरच्या कंपनीशी करार यापुढे कायम ठेवून नये, तो मोडावा, अशी विनंती व्यापारी संघटनेने सचिनला केलेली आहे.
सचिनचे देशप्रेम सर्वांना परिचीत आहे. त्यामुळे सचिनकडून अशी चूक होणे गंभीर असल्याचे चाहत्यांना वाटत आहे. कारण सध्याच्या घडीला भारत आणि चीन यांच्यातील संबंध चांगलेच ताणले गेलेले आहेत. या सर्व गोष्टींमुळे चीनच्या विवो कंपनीला आयपीएलचे प्रायोजकत्वही सोडावे लागले होते. त्यामुळे आता सचिनने चीनच्या कंपनीशी करार केला असेल तर त्याने हा करार मोडीत काढावा, अशी विनंती त्याला पत्राच्या माध्यमातून व्यापारी संघटनेने केली आहे
व्यापारी संघटनेने सचिनला लिहिलेल्या पत्रामध्ये म्हटले आहे की, ” सध्याच्या घडीला भारत आणि चीन या दोन्ही देशांमध्ये तणावाचे वातावरण आहे. या परिस्थितीमध्ये तुमच्यासारखा देशप्रेमी व्यक्ती चीनच्या कंपनीबरोबर कसा काय करार करू शकतो, ही आश्चर्यचकित करणारी गोष्ट आहे. तुमच्यासाठी पैशापेक्षा देशप्रेम महत्वाचे आहे, हे आम्ही जाणतोच. त्यामुळे चीनी कंपनीबरोबरचा हा करार रद्द करावा, अशी आम्ही तुम्हाला विनंती करत आहोत.”
सचिनने याप्रकरणी आपली भूमिका अजून मांडलेली नाही. त्यामुळे सचिन या पत्राला नेमके कसे उत्तर देतो आणि आपली भूमिका कशी मांडतो, याकडे आता सर्व चाहत्यांचे लक्ष लागून राहिलेले आहे.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
