या हंगामातील पहिला सामना जिंकल्यावर कोहली हा भन्नाट खूष झालेला पाहायला मिळाला. सामना जिंकल्यावर कोहलीने मैदानात जोरदार सेलिब्रेशन तर केले. पण त्यानंतर ड्रेसिंग रुममध्ये एकच धमाल उडवून दिली. यावेळी आरसीबीच्या संघातील खेळाडूंनीही कोहलीला चांगली साथ दिली. कोहलीने ड्रेसिंग रुममध्ये नेमकं केलं तरी काय, पाहा…
युजवेंद्र चहलच्या भेदक गोलंदाजीच्या जोरावर आरसीबीने हा सामना जिंकला होता. चहलने हैदराबादच्या तीन फलंदाजांना बाद केले होते. त्यामुळे आरसीबीला हैदराबादवर दहा धावांनी विजय मिळवता आला होता. आरसीबीने यावेळी विजयी सलामी दिली आणि त्यामुळेच कोहली आनंदात होता.
हैदराबादने नाणेफेक जिंकून आरसीबीला प्रथम फलंदाजी करण्यासाठी पाचारण केले होते. पण त्यांचा हा निर्णय आरसीबीचा युवा सलामीवीर देवदत्त पलीक्कडने चुकीचा असल्याचे दाखवून दिले. आपल्याच पहिल्याच सामन्यात देवदत्तने अर्धशतक झळकावत आपली निवड कशी योग्य आहे, हे दाखवून दिले. देवदत्तने पदार्पणाच्या सामन्यात ४२ चेंडूंत आठ चौकारांच्या जोरावर ५६ धावांची दमदार खेळी साकारली. त्याला दुसऱ्या टोकाकडून आरोन फिंचनेही चांगली साथ दिली. देवदत्त आणि फिंच या दोघांनी मिळून आरसीबीला ९० धावांची सलामी दिली.
देवदत्त आणि फिंच हे दोघेही लागोपाठच्या षटकात बाद झाले आणि कर्णधार कोहली मैदानात आला. कोहलीबरोबर आरसीबीचा हुकमी फलंदाज एबी डी व्हिलियर्सही यांनी सावधपणे फलंदाजीला सुरुवात केली. पण कोहलीला यावेळी जास्त धावा करता आल्या नाहीत. कोहलीला १३ चेंडूं १४ धावाच करता आल्या. कोहलीला नटराजनने रशिद खानकरवी झेलबाद केले. कोहली बाद झाल्यावर संघाची सर्व जबाबदारी डी व्हिलियर्सवर आली होती.
डी व्हिलियर्सने स्थिरस्थावर झाल्यावर आपली तुफानी फलंदाजी करायला सुरुवात केली. संदीप शर्माच्या एकाच षटकात दोन षटकार लगावत डी व्हिलियर्सने आपले इरादे स्पष्ट केले आणि त्यानंतर अर्धशतकही पूर्ण केले. डी व्हिलियर्सने ३० चेंडूंत ४ चौकार आणि दोन षटकारांच्या जोरावर ५१ धावा फटकावल्या.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
