ही गोष्ट घडली ती चेन्नईच्य २०व्या षटकात. चेन्नईचा वेगवान गोलंदाज लुंगी एनगिडी टाकत होता. आतापर्यंत लुंगीने भेदक गोलंदाजी केली होती. पण त्याच्या २०व्या षटकात मात्र जोफ्रा आर्चरने चांगलाच लुंगी डान्स केल्याचे पाहायला मिळाले. जोफ्राने या २० षटकात केलेल्या तुफानी फटकेबाजीमुळेच राजस्थानचा चेन्नईपुढे २१७ धावांचे आव्हान ठेवता आले.
लुंगीच्या २०व्या षटकाच्या पहिल्याच चेंडूवर जोफ्राने षटकार लगावला. त्यानंतर दुसऱ्या चेंडूवरही जोफ्राने खणखणीत षटकार खेचला. तिसऱ्या चेंडूवरही जोफ्राने षटकार वसूल केला, पण हा नो बॉल असल्याचे पाहायला मिळाले. त्यानंतर चौथ्या चेंडूवरही जोफ्राने षटकार खेचला. हा चेंडूही नो बॉल होता. त्यामुळे जोफ्राने यावेळी फक्त दोन चेंडूंत २६ धावा फटकावल्याचे पाहायला मिळाले. जोफ्रा आर्चरने तर या सामन्यात फक्त आठ चेंडूंत ४ षटकारांच्या जोरावर नाबाद २७ धावांची खेळी साकारली.
तत्पूर्वी, चेन्नईच्या संघाने नाणेफेक जिंकून प्रथम गोलंदाजी स्वीकारली. पण संजूने हा निर्णय कसा अयोग्य होता, हेच दाखवून दिले. कारण संचजूने सुरुवातीपासून चेन्नईच्या गोलंदाजीवर जोरदार हल्ला चढवला. फिरकी गोलंदाजी हे चेन्नईच बलस्थान समजले जाते. पण संजूने त्यांच्या बलस्थानावरच जोरदार हल्ले चढवले. यावेळी त्याला कर्णधार स्टीव्हन स्मिथचीही चांगली साथ मिळाली. या दोघांनी मिळून फिरकीपटू पीयुष चावलाच्या गोलंदाजीवर तब्बल सहा षटकार वसूल केले, तर रवींद्र जडेजाच्या गोलंदाजीवरही चार षटकार लगावले.
संजूने चेन्नईचे गोलंदाजी खिळखिळी करून टाकली होती. कारण आपल्या धडाकेबाज खेळीत संजूने तब्बल ९ षटकारांची आतिषबाजी केली. संजूने यावेळी फक्त १९ चेंडूंमध्ये वादळी खेळी साकारत आपले अर्धशतक पूर्ण केले होते. त्यानंतरही संजू बरसत राहीला. संजूने चेन्नईविरुद्धच्या सामन्यात ३२ चेंडूंत १ चौकार आणि ९ षटकारांच्या जोरावर ७४ धावांची दमदार खेळी साकारली. संजू आणि स्मिथ यांनी दुसऱ्या विकेटसाठी १२१ धावांची झंझावाती भागीदारी रचली.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
