आतापर्यंतच्या दोन्ही सामन्यांमध्ये संजूने धडाकेबाज खेळी साकारली आहे. या दोन्ही सामन्यांमध्ये संजूने तुफानी फलंदाजी करत अर्धशतके साकारली आहेत. त्यामुळे आता त्याचा धसका आयपीएलमधील गोलंदाजांनी घेतला आहे. त्याचबरोबर संजूला आतापर्यंत भारतीय संघात स्थान का मिळाले नाही, याबाबतही काही जणांनी आश्चर्य व्यक्त केले आहे.
संजूबाबत एक ट्विट थरुर यांनी केले होते. त्यामध्ये थरुर यांनी म्हटले होते की, ” राजस्थानने रविवारी अविस्मरणीय विजय साकारला. राजस्थान रॉयल्सकडून खेळणाऱ्या संजू सॅमसनला मी १० वर्षांपासून ओळखतो. संजू जेव्हा १४ वर्षांचा होता, तेव्हा तु पुढचा महेंद्रसिंग धोनी आहे, असे मी त्याला म्हटले होते. माझ्यामते तो दिवस आता आलेला आहे. आयपीएलमधील त्याच्या या दोन खेळ्या पाहिल्या तर एक आंतरराष्ट्रीय दर्जाचा खेळाडू आलेला आहे, हे आपल्याला पाहायला मिळत आहे.”
थरुर यांच्या ट्विटवर गंभीरने आक्षेप घेतला आहे, त्याचबरोबर त्याने यावेळी आपले मतही मांडले आहे. गंभीरने ट्विटमध्ये लिहिले आहे की, ” संजू सॅमसनला पुढचा कोणताही खेळाडू होण्याची गरज नाही. कारण भारतीय क्रिकेटचा संजू सॅमसन असेल.” आपल्या या ट्विटमधून संजूची कोणाशीही तुलना करू नये, असे गंभीरने थरुर यांना सांगितले आहे. काही दिवसांपूर्वी गंभीरने संजूला भारतीय संघात स्थान का मिळत नाही, असेही एक ट्विट केले होते. त्याचबरोबर गंभीरने काही दिवसांपूर्वी धोनीवरही टीका केली होती. त्यामुळे संजूची धोनीबरोबर तुलना करणे योग्य नाही, असेच गंभीरला आपल्या ट्विटमधून थरुर यांना सुचवायचे होते.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
