आजच्या सामन्याची नाणेफेक झाल्यावर धोनीच्या नावावर एक विक्रम झाल्याचे पाहायला मिळाले. आतापर्यंत आयपीएलमध्ये सर्वात जास्त सामने हे आता धोनीच्या नावावर झाले आहेत. त्याचबरोबर धोनीने हा विक्रम रचताना यावेळी आपल्याच संघात असलेल्या सुरेश रैनाला पिछाडीवर सोडले आहे. यापूर्वी आयपीएलमध्ये सर्वात जास्त सामने खेळण्याचा विक्रम हा रैनाच्या नावावर होता. पण आता हा विक्रम धोनीच्या नावावर असेल. धोनीच्या नावावर आता एक खेळाडू म्हणून सर्वाधिक १९४ सामन्यांची नोंद झाल्याचे पाहायला मिळत आहे.
धोनी हा आयपीएलमध्ये सुरुवातीला चेन्नई सुपर किंग्स संघाचा कर्णधार होता. पण जेव्हा चेन्नईच्या संघावर बंदी घालण्यात आली त्यानंतर धोनी हा पुण्याचा संघाचा कर्णधार झाल्याचे पाहायला मिळाले होते. पण चेन्नईच्या संघावरची बंदी उठल्यावर धोनी आपल्या जुन्या संघात कर्णधार म्हणून आला होता. त्यामुळे आतापर्यंत आयपीएलच्या इतिहासामध्ये एक खेळाडू म्हणून सर्वात जास्त सामने आता धोनीच्या नावावर असल्याचे पाहायला मिळत आहे.
सध्याच्या घडीला चेन्नई सुपर किंग्ससारखा बलाढ्य संघ हा आयपीएलच्या गुणतालिकेत तळाला पोहोचला आहे. त्यामुळे आजचा सामना जिंकण्यासाठी चेन्नईचा कर्णधार महेंद्रसिंग धोनीचा चांगलाच कस लागणार आहे. चेन्नईचा आजचा सामान हैदराबादबरोबर होणार आहे. त्यामुळे हैदराबादला पराभूत करून चेन्नईचा संघ तळाचे स्थान सोडणार का, हे पाहणे उत्सुकतेचे ठरणार आहे.
चेन्नईच्या संघाने या आयपीएलमध्ये सलामीचा सामना जिंकला होता. त्यानंतर त्यांना सलग दोन सामन्यांमध्ये पराभव पत्करावा लागलेला आहे. त्यामुळे त्यांचा संघ आठव्या स्थानावर आहे. आतापर्यंत धोनीला चांगली फलंदाजी करता आलेली नाही. त्याचबरोबर चेन्नईच्या दोन्ही सलामीवीरांना आतापर्यंत सूर गवसल्याचे पाहायला मिळालेले नाही. त्यामुळे चेन्नईचा संघ या सामन्यात सलामीच्या जोडीत बदल करण्याची शक्यता आहे. हा सामना जर चेन्नईला जिंकायचा असेल तर त्यांना संघात नक्कीच काही बदल करावे लागतील. त्यामुळे हैदराबादविरुद्धच्या सामन्यासाठी चेन्नईच्या संघात कोणाला स्थान मिळते, याची उत्सुकता चाहत्यांना असेल.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
