MI vs , अबू धाबी: फॉर्मात असलेले फलंदाज, मुख्यतः डावाच्या अखेरच्या षटकांमध्ये प्रभावी मारा करणारे गोलंदाज, अशा जमेच्या बाजूंमुळे शुक्रवारी कोलकाता नाइट रायडर्सविरुद्धच्या इंडियन प्रीमियर लीग टी-२० स्पर्धेच्या लढतीत गतविजेते मुंबई इंडियन्स विजयासाठी ‘फेव्हरिट’ समजले जात आहेत. त्यात ‘रोहित शर्मा आणि कंपनी’ने आपले मागील सलग चार सामने जिंकून प्रतिस्पर्ध्यांमध्ये दहशत पसरवली आहे. त्यामुळे दिनेश कार्तिकच्या कोलकाता संघाला प्रत्येक पाऊल विचारपूर्वक टाकावे लागेल.

कोलकात्यापुढील अडचणीही मोठ्या आहेत. त्यात त्यांचा प्रमुख स्पिनर सुनील नारायणच्या गोलंदाजीच्या शैलीवर शंका उपस्थित झाली आहे. त्याच्या वादग्रस्त शैलीबाबत निरसन झाल्याशिवाय तरी तो अंतिम अकरामध्ये खेळू शकणार नाही. गेल्या लढतीत कोलकात्याला बेंगळुरूकडून तब्बल ८२ धावांनी मार खावा लागला आहे. मुंबईचे सगळे मस्त चालले आहे. ज्यामुळे कर्णधार रोहित शर्मा अंतिम अकरामध्ये बदल करणार नाही, असे दिसते आहे. एकूणच विजय मिळवण्याची संधी रोहितच्या मुंबई इंडियन्सला अधिक आहे.
ही लढत शेख झाएद स्टेडियमवर होते आहे, जिथे मुंबईचा कर्णधार रोहितने याच मोसमातील दोन अर्धशतके झळकावली आहेत. रोहितने आतापर्यंतच्या लढतींत २१६ धावा कुटल्या असून खासकरून कोलकात्याविरुद्ध खेळताना त्याची कामगिरी अधिक चांगली होते. याच मोसमातील कोलकात्याविरुद्धच्या गेल्या लढतीत रोहितने याच मैदानावर ८० धावांची तडाखेबंद खेळी केली आहे. ज्यामुळे मुंबईने कोलकात्यावर ४९ धावांनी विजय नोंदवला होता.

रोहितच नव्हे, तर मुंबईकडून प्रत्येक जण आपले योगदान देत आहे. क्वींटन डीकॉक (१९१ धावा), सूर्यकुमार यादव (२३३ धावा) यांची बॅटही गरमागरम आहे, जिचा तडाखा कोलकात्याच्या गोलंदाजांना बसू शकतो. ईशान किशनने (१८६ धावा) उपयुक्तता सिद्ध केली आहे. त्याच्या बेंगळुरूविरुद्धच्या ९९ धावा तर संस्मरणीय; पण ईशानने सातत्याने चांगल्या सुरुवातीचे रुपांतर मोठ्या खेळीत करणे आवश्यक आहे.

मुंबईचा प्रशिक्षक महेला जयवर्धन हे हार्दिक पंड्या आणि कायरॉन पोलार्ड यांच्या कामगिरीवरही खूष आहेत. प्रतिस्पर्ध्यांच्या गोलंदाजीचे कंबरडे मोडायचे, ही या दोघांची भूमिका आहे. त्यांना कृणाल पंड्याचीही तोलामोलाची साथ लाभते. गोलंदाजीतही मुंबईची समीकरणे जुळली आहेत. ट्रेंट बोल्ट आणि जसप्रीत बुमराह हे आंतरराष्ट्रीय गोलंदाज मोठी जबाबदारी यशस्वी पार पाडतात. त्यांना ऑस्ट्रेलियाच्या जेम्स पॅटिन्सनचा ‘हातभार’. या त्रिकूटाने आतापर्यंत मिळून ३१ विकेट टिपल्या आहेत. फिरकीसाठी मुंबईकडे राहुल चहर आणि कृणाल पंड्याचा पर्यायही असेल.

आंद्रे रसेल आणि इतर फलंदाजांच्या कामगिरीत नसलेले सातत्य हे कोलकाता संघाचे ‘दुखणे’ आहे. बिरूदाला साजेशी कामगिरी कोलकात्या फलंदाजांना करता आली, तर त्यांच्यासाठी अर्धी लढाई जिंकल्यासारखे होईल. तरुणतडफदार शुभमन गिल, इंग्लंडचा वर्ल्ड कप विजेता कर्णधार इयन मॉर्गन, टी-२०ला साजेसा नितीश राणा आणि स्वतः कर्णधार दिनेश कार्तिक अशी फलंदाजांची फळी कोलकात्याकडे आहे. यांनी आपापली कामगिरी केली, तर राहुल त्रिपाठी आणि टॉम बँटनवरील भार हलका होतो. कोलकात्याचे गोलंदाज चांगली कामगिरी करत आहेत. पंजाब आणि चेन्नईवरील निसटत्या विजयात गोलंदाज चमकले आहेत. मात्र बेंगळुरूविरुद्ध कॅमिन्स आणि प्रसिद्ध क्रिषनकडून धावांची खैरात वाटली गेली होती. हे विसरून चुका सुधारून त्यांनी सज्ज व्हायचे आहे. कुलदीप यादवला संधी मिळणार का? याची उत्सुकता आहे. शिवाय वरुण चक्रवर्तीही कार्तिकचा विश्वास सार्थ ठरवतो.

Sports News in Marathi: Latest Marathi News on Cricket, Football, Tennis, Hockey & more | Maharashtra Times

LEAVE A REPLY

Please enter your comment!
Please enter your name here