चेन्नईच्या संघाने आजच्या सामन्यात नाणेफेक जिंकली आणि प्रथम फलंदाजी करण्याचा निर्णय घेतला. चेन्नईच्या डावाची सुरुवात यावेळी चांगली झाली नाही. कारण पहिल्याच षटकात चेन्नईचा सलामीवीर सॅम करन बाद झाला, त्याला भोपळाही फोडता आला नाही. पण त्यानंतर शेन वॉटसन आणि फॅफ ड्यू प्लेसिस यांनी चेन्नईच्या डावाला चांगला आकार दिला. या दोघांनी यावेळी दुसऱ्या विकेटसाठी ८७ धावांची भागीदारी रचली.
ही जोडी दिल्लीचा वेगवान गोलंदाज अॅनरीच नॉर्कियाने फोडली. नॉर्कियाने यावेळी वॉटसनला बाद केले. वॉटसनने यावेळी २८ चेंडूंत सहा चौकारांच्या जोरावर ३६ धावांची खेळी साकारली. वॉटसन आऊट झाला असला तरी फॅफने यावेळी आपले अर्धशतक साजरे केले. फॅफचे या मोसमातील हे चौथे अर्धशतक ठरले. फॅफने या सामन्यात ४७ चेंडूंत सहा चौकार आणि दोन षटकारांच्या जोरावर ५८ धावांची खेळी साकारली.
वॉटसन आणि फॅफ ड्यू प्लेसिस बाग झाल्या अंबाती रायुडूने यावेळी धडाकेबाज फलंदाजी केली. पण महेंद्रसिंग धोनी या सामन्यातही मोठी खेळी साकारण्यात अपयशी ठरला. नॉर्कियाने यावेळी धोनीला बाद केले, धोनीला यावेळी तीन धावांवर समाधान मानावे लागले. पण धोनी बाद झाला असला तरी रायुडूने आपली फटकेबाजी कायम ठेवली होती.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
