चेन्नईच्या १८० धावांच्या आव्हानाचा पाठलाग करताना दिल्लीच्या संघाची सुरुवात चांगली झाली नाही. कारण त्यांना पहिल्याच षटकात धक्का बसला. पहिल्या षटकाच्या दुसऱ्याच चेंडूवर यावेळी पृथ्वी शॉ बाद झाला, त्याला भोपळाही फोडता आला नाही. त्यानंतर अजिंक्य रहाणेच्या रुपात दिल्ली दुसरा धक्का बसला. रहाणेला यावेळी आठ धावांवर समाधान मानावे लागले. पण त्यानंतर सलामीवीर शिखर धवन आणि कर्णधार श्रेयस अय्यर यांची चांगली जोडी जमली.
धवन आणि अय्यर यांनी यावेळी चेन्नईच्या गोलंदाजांचा चांगलाच समाचार घेतला. ही जोडी आता मोठी धावसंख्या उभारेल असेल वाटत होते. पण यावेळी चेन्नईच्या ड्वेन ब्राव्होने ही जोडी फोडली आणि चेन्नईच्या संघाला मोठे यश मिळवून दिले. अय्यरने यावेळी २३ धावा केल्या. एकाबाजूने विकेट्स पडत असल्याचे तरी धवन मात्र दुसऱ्या बाजूने जोरदार फटकेबाजी करत होता.
धवनने यावेळी आपले अर्धशतकही साकारले. या आयपीएलमधील त्याचे हे सलग तिसरे अर्धशतक ठरले. जोरदार फटकेबाजी करत धवनने यावेळी चेन्नईच्या गोलंदाजीवर चांगलाच अंकुश ठेवला होता. अय्यर बाद झाल्यावर फलंदाजीला आलेल्या मार्कस स्टॉइनिसने यावेळई १४ चेंडूंत २४ धावा केल्या. पण शार्दुल ठाकूरने त्याला बाद करत संघाला चौथे यश मिळवून दिले.
चेन्नई सुपर किंग्सच्या फलंदाजांनी यावेळी दिल्ली कॅपिटल्सच्या गोलंदाजांची चांगलीच धुलाई केली. फॅफ ड्यू प्लेसिसने यावेळ अर्धशतक झळकावले, तर शेन वॉटसन, रवींद्र जडेजा आणि अंबाती रायुडू यांनी यावेळी दमदार खेळी साकारल्या. त्यामुळेच चेन्नईच्या संघाला यावेळी दिल्लीपुढे १८० धावांचे आव्हान ठेवता आले. जडेजाने अखेरच्या षटकांमध्ये जोरदार फटकेबाजी केली. जडेजाने यावेळी फक्त १३ चेंडूंत चार षटकारांच्या जोरावर नाबाद ३३ धावांची तुफानी खेळी साकारली. रायुडूने यावेळी २५ चेंडूंत १ चौकार आणि चार षटकारांच्या जोराव नाबाद ४५ धावा केल्या.
चेन्नईच्या संघाने आजच्या सामन्यात नाणेफेक जिंकली आणि प्रथम फलंदाजी करण्याचा निर्णय घेतला. चेन्नईच्या डावाची सुरुवात यावेळी चांगली झाली नाही. कारण पहिल्याच षटकात चेन्नईचा सलामीवीर सॅम करन बाद झाला, त्याला भोपळाही फोडता आला नाही. पण त्यानंतर शेन वॉटसन आणि फॅफ ड्यू प्लेसिस यांनी चेन्नईच्या डावाला चांगला आकार दिला. या दोघांनी यावेळी दुसऱ्या विकेटसाठी ८७ धावांची भागीदारी रचली.
ही जोडी दिल्लीचा वेगवान गोलंदाज अॅनरीच नॉर्कियाने फोडली. नॉर्कियाने यावेळी वॉटसनला बाद केले. वॉटसनने यावेळी २८ चेंडूंत सहा चौकारांच्या जोरावर ३६ धावांची खेळी साकारली. वॉटसन आऊट झाला असला तरी फॅफने यावेळी आपले अर्धशतक साजरे केले. फॅफचे या मोसमातील हे चौथे अर्धशतक ठरले. फॅफने या सामन्यात ४७ चेंडूंत सहा चौकार आणि दोन षटकारांच्या जोरावर ५८ धावांची खेळी साकारली.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
