आजच्या सामन्यात कर्णधार महेंद्रसिंग धोनीकडून काही चुका झाल्या आणि त्या संघाला भारी पडल्याचे पाहायला मिळाले. आतापर्यंत चेन्नईच्या वेगवान गोलंदाजांनी चांगली कामगिरी केली आहे. या सामन्यात त्यांचा हुकमी एक्का ड्वेन ब्राव्हो खेळणार नव्हता. त्याच्या जागी संघात जोश हेझलवूडला संधी देण्यात आली. पण या आयपीएलच्या सुरुवातीच्या काही सामन्यांमध्ये लुंगी एन्गिडीने चांगली कामगिरी केली होती. पण त्याच्या विचार न करता धोनीने या सामन्यात फिरकीपटू पियुष चावलाला संधी दिल्याचे पाहायला मिळाले. आजच्या सामन्यात चावलाला चांगलाच मार पडला. चावलाने या सामन्यात ३ षटकांत २१ धावा दिल्या आणि चेन्नईकडून तो सर्वात महागडा खेळाडू ठरला.
धोनीने आजच्या सामन्यात केदार जाधववर विश्वास कायम ठेवल्याचे पाहायला मिळाले. युवा जगदीशनच्या जागी केदार संघात आला होता. यापूर्वी केदारकडून चांगली कामगिरी झाली नव्हती. या सामन्यातही केदारला सात चेंडू खेळायला मिळाले. पण या सात चेंडूंमध्ये केदारला फक्त चार धावांवर समाधान मानावे लागले. या सातपैकी २-३ चेंडूंवर जरी मोठे फटके केदारने खेचले असले तरी चेन्नईची धावसंख्या वाढली होती. केदार या सामन्यातही अपयशी ठरला. त्याचबरोबर या सामन्यानंतर केदार सोशल मीडियावर चांगलाच ट्रोल होत असल्याचेही पाहायला मिळाले.
चेन्नईच्या फलंदाजांना आजच्या सामन्यात चांगली लय सापडली नाही. चेन्नईचे चार फलंदाज बाद झाल्यावर धोनी आणि रवींद्र जडेजा यांची चांगली भागीदारी पाहायला मिळाली. या दोघांनी स्थिरस्थावर होण्यासाठी थोडा वेळ घेतला. पण त्यानंतर अखेरच्या षटकांमध्ये त्यांच्याकडून मोठ्या फटकेबाजीची अपेक्षा होती. पण यावेळी धोनी चोरटी धाव घेण्याच्या प्रयत्नामध्ये बाद झाला. धोनी ऐन मोक्याच्या क्षणी बाद झाला आणि त्याचाच परीणाम चेन्नईच्या धावसंख्येवर झाल्याचेही पाहायला मिळाले. धोनीला या सामन्यात २८ चेंडूंत २८ धावाच करता आल्या. ट्वेन्टी-२० क्रिकेटचा विचार करता ही खेळी नक्कीच धोनीसारख्या अनुभवी क्रिकेटपटूच्या लौकिकाला साजेशी नव्हती.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
