पंजाबचा संघ काही दिवसांपूर्वी आयपीएलच्या गुणतालिकेत तळाला असल्याचेही पाहायला मिळाले होते. पण त्यानंतर पंजाबने सलग तीन विजय मिळवले आणि गुणतालिकेत आज त्यांनी चांगलीच मोठी झेप घेतली आहे. या सामन्यापूर्वी पंजाबच्या संघाने ९ सामने खेळले होते, या ९ सामन्यांमध्ये त्यांना तीन विजय मिळवता आले होते. त्याचबरोबर सहा पराभव त्यांना पत्करावे लागले होते. आपण आजच्या दहाव्या सामन्यात त्यांनी विजयासह दोन गुण मिळवले. या दोन गुणांसह पंजाबचा संघ आता गुणतालिकेत पाचव्या स्थानावर पोहोचला आहे. त्यामुळे आता पंजाबचा संघ अव्वल चार संघांमध्ये स्थान मिळवणार का, याची उत्सुकता सर्वांनाच असेल.
दिल्लीचा संघ या सामन्यापूर्वी अव्वल स्थानावर विराजमान होता. या सामन्यापूर्वी दिल्लीच्या ९ लढती झाल्या होत्या. ९ सामन्यांमध्ये दिल्लीच्या संघाने सात विजय मिळवले होते, तर दोन सामन्यांमध्ये त्यांना पराभव पत्करावा लागला होता. आजच्या सामन्यात त्यांना पंजाबकडून मोठा पराभव पत्करावा लागला. पण या पराभवानंतरही दिल्लीच्या संघाचे गुणतालिकेतील अव्वल स्थान कायम आहे. कारण दिल्लीच्या खात्यामध्ये सर्वाधिक १४ गुण आहेत. आयपीएलमध्ये सध्याच्या घडीला दिल्ली वगळता कोणत्या संघाच्या खात्यामध्ये १४ गुण नाहीत.
सध्याच्या घडीला पराभवानंतरही दिल्लीने आपले अव्वल स्थान कायम राखले आहे. मुंबई इंडियन्सचा संघ गुणतालिकेत दुसऱ्या स्थानावर आहे. गुणतालिकेतील तिसरे स्थान विराट कोहलीच्या नेतृत्वाखालील आरसीबीच्या संघाने पटकावले आहे. केकेआरचा संघ गुणतालिकेत चौथ्या स्थानावर आहे. या सामन्यातील विजयासह पंजाबने गुणतालिकेत पाचवे स्थान पटकावले आहे.
निकोलस पुरनच्या झंझावाती अर्धशतकाच्या जोरावर किंग्स इलेव्हन पंजाबने आजच्या सामन्यात अव्वल स्थानावरील दिल्ली कॅपिटल्सला धक्का दिला. दिल्लीने पंजाबपुढे विजयासाठी १६५ धावांचे आव्हान ठेवले होते. पुरनचे अर्धशतक आणि ख्रिस गेलच्या धमाकेदार फलंदाजीच्या जोरावर पंजाबने यावेळी दिल्लीवर पाच विकेट्स राखून विजय मिळवला.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
