सिराजचे वडिल रिक्षा चालवायचे. त्यामुळे त्याचे लहानपणी त्याला क्रिकेटचे प्रशिक्षण मिळू शकले नाही. सिराज हा गल्ली क्रिकेट खेळायचा. पण सिराज हा पूर्वी फलंदाजी करायचा. पण त्यानंतर तो गोलंदाजीकडे वळला आणि यामध्ये त्याच्या भावाचे मोठे योगदान होते. गल्लीमध्ये सिराजच्या गोलंदाजीची चांगलीच दहशत होती. पण गल्लीसोडून मोठ्या स्तरावर त्याला खेळायला मिळत नव्हते. एके दिवशी सिराजच्या एका मित्राने त्याला आपल्या चारमिनार क्रिकेट क्लबमध्ये खेळायला बोलावले. २०१५ हे ते वर्ष होते. सिराजने या सामन्यात आपल्या भेदक गोलंदाजीच्या जोरावर अर्धा संघच गारद केला, त्याने प्रतिस्पर्धी संघातील पाच फलंदाजाना बाद केले. त्याची ही कामगिरी पाहून त्याला हैदराबादच्या २३ वर्षांखालील संघात स्थान देण्यात आले.
सिराजने त्यानंतर अथक मेहनत घेतली आणि त्याचवर्षी त्याची निवड रणजी करंडक क्रिकेट स्पर्धेत झाली. पण त्यावर्षी तो फक्त एकच सामना खेळू शकला. पण त्यानंतर २०१६ साली मात्र सिराज हा हैदराबादचा सर्वाधिक बळी मिळवणारा गोलंदाज होता. या वर्षात त्याने ४१ बळी रणजी स्पर्धेत घेतले होते. त्यानंतर सिराजची गोलंदाजी ही प्रकाशझोतात येऊ लागली आणि सिराजला भारतीय संघातही स्थान मिळाले. आपल्या पहिल्याच ट्वेन्टी-२० सामन्यामध्ये सिराजने न्यूझीलंडचा कर्णधार केन विल्यम्सनची विकेट मिळवली होती.
आयपीएलमध्ये सिराज २०१७ साली आला. हैदराबादच्या संघाने सिराजला मूळ किंमतीपेक्षा १३ पट रक्कम यावेळी दिली. त्यावेळी २.६० कोटी रुपयांमध्ये हैदराबादने सिराजला आपल्या संघात स्थान दिले होते. पण त्यानंतर पुढच्याच म्हणजे २०१८ साली आरसीबीच्या संघाची त्याच्यावर नजर गेली आणि त्यांनी सिराजला आपल्या संघात स्थान दिले. त्यानंतर गेल्या दोन वर्षांपासून सिराज हा आरसीबीकडून खेळत आहे. आजच्या केकेआरविरुद्धच्या सामन्यात तर सिराजने तिखट मारा करत चार षटकांमध्ये तीन फलंदाजांना बाद करत फक्त आठ धावाच दिल्या, त्याचबरोबर सिराजने यावेळी दोन षटके निर्धावही टाकल्याचे पाहायला मिळाले.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
