चेन्नईचा संघ सध्याच्या घडीला गुणतालिकेत अखेरच्या म्हणजे आठव्या स्थानावर आहे. पण तरीही त्यांचे आयपीएलमधील आव्हान संपुष्टात आलेले नाही. कारण सध्याच्या घडीला चेन्नईने १० सामने खेळले आहेत. या दहा सामन्यांमध्ये चेन्नईने तीन विजय मिळवले आहेत, तर त्यांना सात सामन्यांमध्ये पराभव पत्करावा लागला आहे. त्यामुळे चेन्नईचे सध्याच्या घडीला सहा गुण आहेत. आता चेन्नईचे चार सामने बाकी आहेत. या चार सामन्यांमध्ये जर त्यांनी विजय मिळवला तर त्यांचे १४ गुण होऊ शकतात. त्यामुळे आता यापुढील सर्वच सामने चेन्नईच्या संघाला जिंकावे लागतील. जर चारपैकी एकही सामना चेन्नईने गमावला तर त्यांचे या आयपीएलमधील आव्हान संपुष्टात येऊ शकते.
चेन्नईने या हंगामातील पहिल्या सामन्यात मुंबईचा पराभव केला होता. पण त्या विजयानंतर चेन्नईला यश मिळालेच नाही. सध्या मुंबई इंडियन्सचा संघ जबरदस्त फॉममध्ये आहे. सलग पाच विजयानंतर किंग्ज इलेव्हन पंजाबविरुद्ध त्यांचा पराभव झाला होता. तो सामना डबल सुपर ओव्हरमध्ये गेला होता. मुंबईचे गोलंदाज चेन्नईच्या फलंदाजांना अडचणीत आणू शकतात. मुंबईचा संघ हा चांगलाच समतोल दिसत आहे. कारण त्यांची फलंदाजी आणि गोलंदाजी चांगली होत आहे. पण आजच्या सामन्यात मुंबईचा संघ पहिल्या सामन्यातील पराभवाचा बदला घेणार का, याची उत्सुकता चाहत्यांना नक्कीच असेल.
गेल्या सामन्यात राजस्थानविरुद्ध त्यांचा पराभव झाला आणि आता ड्वेन ब्रावो देखील आयपीएलमधून बाहेर झाला आहे. हा चेन्नईसाठी नक्कीच मोठा धक्का आहे. पण ब्राव्होच्या जागी संघात आलेला वेगवान गोलंदाज जोश हेझलवूड हा चांगली कामगिरी करत आहे. गेल्या सामन्यात जोशने भेदक गोलंदाजी केल्याचे पाहायला मिळाले आहे. पण चेन्नईला जर आजचा सामना जिंकायचा असेल, तर त्यांना फलंदाजीकडे जास्त लक्ष द्यावे लागणार आहे. कारण गेल्या काही सामन्यांमध्ये त्यांना मोठी धावसंख्या उभारता आलेली नाही. त्यामुळे या महत्वाच्या सामन्यात चेन्नईचे फलंदाज कशी कामगिरी करतात, याकडे सर्वांचे लक्ष असेल.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
