हिप हिप हुर्रे! सुनीलने संपवला ‘सुवर्ण’दुष्काळ

नवी दिल्लीः सुनीलकुमारने मंगळवारी किर्गिस्तानच्या अझात सिलदिनोव्हावर ५-० अशी एकतर्फी मात करत आशियाई कुस्ती अजिंक्यपद स्पर्धेतील ग्रीकोरोमनच्या ८७ किलो वजनी गटात भारताला सुवर्णपदकाची कमाई करून दिली. तब्बल २७ वर्षांनी भारताने या स्पर्धेत पदकाची कमाई केली.

संघर्षाची उपांत्य फेरी

खाशाबा जाधव बंदीस्त क्रीडा संकुलात पार पडलेल्या या स्पर्धेतील उपांत्य लढतीत सुनील हा पिछाडीवर होता; मात्र त्याने ही सलग ११ गुणांची कमाई करत पिछाडी भरून काढत कझाकिस्तानच्या अझामत कुस्तूबायेव्हवर १२-८ असा विजय मिळवला. २०१९मध्येही सुनीलकुमारने २०१९मध्येही या स्पर्धेच्या अंतिम फेरीत धडक मारली होती; पण तेव्हा त्याला उपविजेतेपदावर समाधान मानावे लागले आणि रौप्य मिळाले. ती कसर सुनीलने यावर्षी भरून काढली.

अर्जुनला ब्राँझ

ग्रीको-रोमनमधील ५५ किलो वजनी गटात भारताच्या अर्जुन हाराकुर्कीला ब्राँझपदकावर समाधान मानावे लागले. आतापर्यंत ज्युनियरच्या स्पर्धांमध्ये भाग घेणाऱ्या अर्जुनची ही पहिलीच सीनियर स्तरावरील स्पर्धा होती. आपल्या या पहिल्याच प्रयत्नात पदकाची कमाई केल्यामुळे सहाजिकच अर्जुनचा आत्मविश्वास दुणावला असेल; मात्र ज्या उपांत्य लढतीत त्याचा पराभव झाला, त्यात त्याने खणखणीत आघाडी गमावली ही बाब मात्र अर्जुनलाला कायम सलत राहील. इराणचा मल्ल नासरपॉरविरुद्धच्या उपांत्य फेरी लढतीत अर्जुन हा ७-१ असा खणखणीत आघाडीवर होता. मात्र इराणी मल्लाने नंतर सलग सात गुणांची कमाई करत बाजी मारली अन् अंतिम फेरीत प्रवेश केला.