खासदार असावा तर असा; करोनाग्रस्तांसाठी दिला २ वर्षाचा पगार!

नवी दिल्ली: भारतीय क्रिकेट संघातील माजी सलामीवीर आणि विद्यमान खासदार गौतम गंभीर याने करोना व्हायरसविरुद्धच्या लढ्यात आतापर्यंत कोणी केली नाही अशी मोठी घोषणा केली आहे. करोनाविरुद्धच्या लढ्यात प्रत्येक जण केंद्र आणि राज्य सरकारला मदत करत आहे.

वाचा-
पंतप्रधान नरेंद्र मोदी यांनी करोनाविरुद्धच्या लढ्यासाठी मदत करण्याचे आवाहन केले होते. करोनाग्रस्तांसाठी भाजपचा खासदार असलेल्या गंभीरने याआधी खासदार निधीतून ५० लाख आणि नंतर एक कोटी रुपये दिले होते. आज (गुरुवारी) गंभीरने पुढील दोन वर्षाचा पगार पंतप्रधान मदत निधीला देण्याची घोषणा केली आहे.

वाचा-
करोनाविरुद्धच्या लढाईत मदत करण्याची गंभीरची ही तिसरी वेळ आहे. लोकसभेतील खासदाराला एका महिन्याला दोन लाख आठशे ३३ रुपये इतका पगार मिळतो. गंभीरने पुढील दोन वर्षाचा पगार कोरनाग्रस्तांसाठी देण्याचे जाहीर केले आहे.

वाचा-

खर तर आज गंभीर दुसऱ्याच एका कारणामुळे सोशल मीडियावर सकाळपासून चर्चेत होता. भारतीय संघाने ९ वर्षापूर्वी आजच्या दिवशीच वर्ल्ड कप जिंकला होता. या विजयाची आठवण शेअर करताना एका वेबसाईटने धोनीने मारलेल्या षटकाराला अतिमहत्त्व दिल्याने गंभीरने एक पोस्ट शेअर केली होती. या पोस्टवर सोशल मीडियावर गंभीर आणि धोनीचे चाहते भिडले आहेत.

वाचा-
त्यानंतर आता गंभीरने दोन वर्षाचा पगार देण्याचे जाहीर केले. त्यामुळे सर्व जण गंभीरचे कौतुक करत आहेत. विशेष म्हणजे अन्य भारतीय क्रिकेटपटूंनी करोनासाठी मदत जाहीर केली असताना धोनीने अद्याप अशी कोणतीही मदत केली नसल्याची चर्चा सोशल मीडियावर आहे.