पाकिस्तान क्रिकेट लीग स्पर्धेतील इस्लामाबाद युनायटेड संघाने जसप्रीत बुमराहचा एक फोटो शेअर केला. हा फोटो २०१७च्या चॅम्पियन्स ट्रॉफी स्पर्धेच्या फायनलमधील आहे. बुमराहकडून टाकण्यात आलेला हा चेंडू नो बॉल होता. या नो बॉलचा फोटो शेअर करताना इस्लामाबाद टीमने म्हटले आहे की, लाइन क्रॉस करू नका महागात पडेल. अंतर ठेवा पण स्वत:च्या हृदयाजवळ रहा. करोना व्हायरस संदर्भात हा मेसेज होता. पण त्याला फोटो मात्र २०१७च्या चॅम्पियन्स ट्रॉफी स्पर्धेतील पाकिस्तानविरुद्ध टाकण्यात आलेल्या बुमराहच्या नो बॉलचा लावला.
इस्लामाबाद संघाच्या या ट्वीटचा भारतीय चाहत्यांनी चांगलाच समाचार घेतला. भारतीय चाहत्यांनी पाक गोलंदाज मोहम्मद आमिरचा नो बॉलचा तो फोटो शेअर केला ज्यामुळे त्याला ५ वर्षांची तुरुंगवासाची शिक्षा झाली होती. आमिरने २०१० मध्ये इंग्लंडविरुद्ध झालेल्या लॉर्ड्स मैदानावरील कसोटी सामन्यात जाणीपूर्वक नो बॉल टाकून मॅच फिक्सिंग केली होती. त्यासाठी त्याला शिक्षा देखील झाली.
दुसऱ्या एका चाहत्याने पाकिस्तानची वर्ल्ड कपमधील भारतीय संघाविरुद्धच्या कामगिरीची आठवण करून दिली. १९९२च्या वर्ल्ड कपपासून आतापर्यंत पाकला कधीच भारताचा पराभव करता आलेला नाही.
याआधी पाकिस्तानच्या फैसलाबाद शहरातील वाहतूक पोलिसांनी बुमराहचा हा फोटो शेअर केला होता. लाइन क्रॉस करू नका. कारण तुम्हाला माहित आहे ते किती महाग पडू शकते.
पाकविरुद्धच्या सामन्यात बुमराहच्या या नो बॉलमुळे सलामीवीर फखर जमा याला जीवनदान मिळाले होते. त्याने ११४ धावांची खेळी करत पाकच्या विजयात महत्त्वाची भूमिका पार पाडली होती. या सामन्यात भारताचा १८० धावांनी पराभव झाला होता.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
