४३ वर्षांपूर्वी इंग्लंडचे माजी फलंदाज डेनिस एमिस यांनी पहिल्यांदा हॅल्मेट वापरल्याचे पाहिले गेले. क्रिकेटमधील आणि विश्वचषकातील पहिले शतकही एमिस यांच्याच नावावर आहे. आजच्या दिवशी एमिस हे ७७ वर्षांचे झाले आहेत.
इंग्लंडचे माजी सलामीवीर एमिस यांनी १०३ धावा करत एकदिवसीय क्रिकेटमधील पहिले शतक पूर्ण केले. २४ ऑगस्ट १९७२ साली ऑस्ट्रेलियाविरुद्ध मँचेस्टर येथे झालेल्या सामन्यात एमिस यांनी शतक पूर्ण केले. एमिस यांचा हा पहिलाच एकदिवसीय सामना होता. पण क्रिकेट जगतातील इंग्लंड आणि ऑस्ट्रेलिया यांच्यातील हा फक्त दुसरा एकदिवसीय सामना होता. त्यामुळे एमिस यांच्या फलंदाजीची त्यावेळी जोरदार चर्चा होत होती.
विश्वचषकातील पहिले शतकही एमिस यांच्याच नावावर आहे. १९७५ साली झालेल्या पहिल्या विश्वचषकात एमिस यांनी भारताविरुद्ध लॉर्ड्स येथील सामन्यात १३७ धावा केल्या होत्या. या सामन्यात भारताचे मध्यमगती गोलंदाज मदन लाल यांनी त्यांना त्रिफळाचीत केले होते. हा पहिल्या विश्वचषकातील पहिलायच सामना होता.
पूर्वी ऑस्ट्रेलिया आणि वेस्ट इंडिज यांच्या संघांतील वेगवान गोलंदाजांचा सामना करणे सोपे नव्हते. त्यामुळे एमिस यांनी एक शक्कल लढवली. ऑस्ट्रेलिया आणि वेस्ट इंडिज यांच्या संघांतील वेगवान गोलंदाजांचा सामना करण्यासाठी त्यांनी चक्क मोटरसायकलचे हॅल्मेट आणले होते. हे हॅल्मेट घालून फलंदाजी करणे सोपे नव्हते. पण तरीही एमिस यांनी शतक पूर्ण केले होते. त्यानंतर १९७८ साली पहिल्यांदा क्रिकेटसाठी हॅल्मेट बनवले गेले. त्यानंतर खऱ्या अर्थाने क्रिकेटमध्ये हॅल्मेटचा वापर व्हायला सुरुवात झाली. त्यापूर्वी फलंदाज स्कल कॅप किंवा टोपी वापरायचे, पण त्याने डोक्याचे संरक्षण योग्य व्हायचे नाही. त्यामुळे अखेर हॅल्मेटचा शोध लावण्यात आला आणि खेळाडूंना हॅल्मेट देण्यात आली.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
