क्रिकेटच्या मैदानात बऱ्याचदा वाद-विवाद, भांडणं होत असतात. पण ही भांडणं मैदानापर्यंतच मर्यादीत ठेवायची असतात. पण एका खेळाडूने युवराजला चक्क मैदानाबाहेर भेटलास तर तुझा गळा कापून टाकेन, अशी धमकी दिली होती. त्यानंतर युवराजला भयंकर राग आला आणि त्यामध्ये त्याने एक गोष्ट केली होती. जी गोष्ट आजही त्याच्या चाहत्यांना आठवत असेल.
नेमके घडले तरी कायभारतीय संघ २००७ साली दक्षिण आफ्रिकेत पहिला ट्वेन्टी-२० विश्वचषक खेळायला गेला होता. या विश्वचषकात भारताचा सामना इंग्लंडबरोबर होता. या सामन्यात युवराजने इंग्लंडचा वेगवान गोलंदाज स्टुअर्ट ब्रॉडला सलग सहा षटकार खेचले होते, हा प्रसंग कोणीही विसरू शकत नाही. पण या सामन्यात युवराजला चक्क गळा कापण्याची धमकी एका खेळाडूने दिली होती.
… तर घडले असे की, युवराज आणि महेंद्रसिंग धोनी हे दोघे त्यावेळी फलंदाजी करत होते. अँड्र्यू फ्टिंटॉफ त्यावेळी गोलंदाजी करत होता. युवराजने त्याच्या षटकार खणखणीत दोन चौकार लगावले. हे षटक संपल्यावर युवराज धोनीबरोबर बातचीत करण्यासाठी चालत पुढे गेला होता. त्यावेळी फ्टिंटॉफ युवराजसमोर आला. त्यावेळी त्याने युवराजला काही अपशब्दही वापरले. कारण त्याच्या चांगल्या चेंडूंवर युवराजने चौकार लगावले होते. त्यामुळे त्याने युवराजला रागात म्हटले की, ” तु बाहेर आलास ना तर तुझा गळा कापेन.”
युवराज काय म्हणाला होता..युवराज हा शांतपणे धोनीशी सल्लामसलत करण्यासाठी आला होता. त्यामध्ये फ्टिंटॉफने त्याला अपशब्द वापरायला सुरुवात केली. सुरुवातीला युवराज आणि धोनी यांनी त्याच्याकडे लक्ष दिले नाही. पण जेव्हा त्याने युवराजला गळा कापण्याची धमकी दिली, तेव्हा मात्र युवराज भडकला. युवराज यावेळी म्हणाला की, ” मला बाहेर पडण्याची धमकी काय देतोस. माझ्या हातात बॅट आहे, त्याने मी काय करेन हे माहिती आहे ना…”
युवराज यावेळी भलताच भडकलेला होता. त्याला फ्टिंटॉफपासून धोनीने दूर नेले आणि त्याला शांत करण्याचा प्रयत्न केला. पण हा राग युवराजच्या डोक्यात गेला होता. त्यामुळे त्यापुढच्या ब्रॉडच्या षटकात युवराजने आपला राग बाहेर काढला आणि एका षटकात सलग सहा षटकार ठोकण्याचा विश्वविक्रम केला.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
