क्रिकेटमध्ये नव्या युगाची सुरूवात? चेंडूवर थुंकी लावण्यास बंदीची शिफारस!

नवी दिल्ली: क्रिकेटमध्ये चेंडू चमकावण्यासाठी इतकी वर्षे थुंकीचा वापर केला जात होता. पण आता थुंकीवर बंदी लागू शकते. करोना व्हायरसवर नियंत्रण मिळवल्यानंतर जेव्हा क्रिकेट सुरू होईल तेव्हा खेळाडूंना त्याची लागण होऊ नये म्हणून आंतरराष्ट्रीय क्रिकेट परिषदेकडून चेंडूवर थुंकी लावण्यावर बंदी घातली जाऊ शकते. यासंदर्भात भारताचा माजी कर्णधार आणि फिरकीपटू अनिल कुंबळेच्या अध्यक्षतेखालील क्रिकेट समितीने ही शिफारस केली आहे.

वाचा-
या संदर्भात आयसीसीची ही बैठक व्हिडिओ कॉन्फरन्सिंगद्वारे झाली. या समितीने प्रत्येक आंतरराष्ट्रीय सामन्यात अटस्थ अंपायरचा नियम मागे घेण्यावर जोर दिला. सध्याची परिस्थिती असामान्य आहे. त्यामुळे समितीच्या या शिफारसी अंतरिम आहेत. यात सर्वांच्या सुरक्षेची काळजी घेता येईल आणि क्रिकेटला पुन्हा रुळावर आणता येईल, असे समितीने म्हटले आहे.

वाचा-
चेंडूला चमकावण्यासाठी थुंकीचा वापर केला जातो. विशेषत: लाल चेंडूवर थुंकीचा वापर स्विंग करण्यासाठी मदत होते म्हणून केला जातो. पण आता असे करणे आरोग्यासाठी धोक्याचे ठरू शकते, असे अनिल कुंबळेने सांगितले. या संदर्भात गेल्या महिन्यापासून अशी आशा व्यक्त केली जात आहे की आयसीसी यावर बंदी घालेल.

चेंडूवर जर थुंकी लावण्यास बंदी घातली तर क्रिकेटमध्ये एका नव्या युगाची सुरूवात होईल, असे बोलले जाते. अर्थात यामुळे चेंडू आणि बॅट यांच्यातील लढत कशी होईल हे येणारा काळच सांगू शकेल. या कल्पनेला मायकल होल्डिंग आणि वकार युनिस सारख्या माजी जलद गोलंदाजांनी विरोध केला, तर काहींनी त्याचे समर्थन केले आहे. आता समितीने केलेल्या शिफारसी मंजूरीसाठी आयसीसीच्या बोर्डा समोर ठेवल्या जातील.