team india, भारतीय क्रिकेट संघ उपांत्य फेरीत दाखल, पाकिस्ताननंतर टीम इंडियाचा अजून एक दणदणीत विजय – indian womens cricket team enters the semi-finals, another resounding victory for team india over barbados

भारताला या सामन्यात प्रथम फलंदाजी करताना सुरुवातीलाच मोठा धक्का बसला होता. कारण भारताची सलामीवीर स्मृती मानधना ही पाच धावांवर बाद झाली. पण त्यानंतर मात्र जेमिमा रॉड्रिगेस आणि शेफाली वर्मा यांनी भारतासाठी दमदार भागादारी रचली. या दोघांनी गोलंदाजांचा चांगलाच समाचार घेतला आणि दुसऱ्या विकेटसाठी ७१ धावांची भागीदारी रचली. यावेळी शेफाली बाद झाल्यामुळे ही जोडी फुटली. शेफालीने यावेळी तुफानी फटकेबाजी करत २६ चेंडूंत सात चौकार आणि एका षटकाराच्या जोरावर ४३ धावांची खेळी साकारली. शेफाली बाद झाली असली तरी त्यानंतर जेमिमाने मात्र भारताच्या संघाची जबाबदारी आपल्या खांद्यावर घेतली. जेमिमाने यावेळ अर्धशतक साकारत भारताला सहजपणे दीडशे धावांचा पल्ला गाठून दिला. जेमिमाने यावेळी ४६ चेंडूंत सहा चौकार आणि एका षटाकारच्या जोरावर नाबाद ५६ धावांची खेळी साकारली. जेमिमाच्या या अर्धशतकी खेळीमुळेच भारताला १६२ धावांपर्यंत मजल मारता आली.

भारताच्या १६३ धावांच्या आव्हानाचा पाठलाग करण्यासाठी मैदानात उतरलेल्या बार्बाडोसच्या संघाला यावेळी रेणुका सिंगने एकामागून एक चार धक्के दिले. रेणुकाने यावेळी चार धक्के दिल्यामुळे बार्बाडोसचे कंबरडे मोडले गेले आणि तिथेच त्यांनी हा सामना गमावला होता. रेणुकाने यावेळी चार षटकांमध्ये फक्त १० धावा देत चार विकेट्स पटकावल्या. त्यानंतर भारताच्या गोलंदाजांनी ही सुवर्णसंधी सोडली नाही. त्यांनी अचूक आणि भेदक मारा करत बार्बाडोसच्या धावसंख्येला चांगलेच वेसण घातले. त्यामुळेच बार्बाडोसच्या संघाने २० षटकांत ८ विकेट्स गमावत फक्त ६२ धावा करता आल्या आणि भारताने १०० धावांनी विजय साकारला.