३८ वर्षीय भारताच्या या माजी कर्णधाराच्या निवृत्तीची चर्चा सोशल मीडियावर होण्याची ही पहिली वेळ नाही. पण मोठ्या कालावधीपासून भारतीय संघातून न खेळलेल्या धोनीला आयपीएलमधून टीम इंडियात परत यायचे होते. पण करोना व्हायरसमुळे आयपीएल अनिश्चित काळासाठी स्थगित करण्यात आली. त्यामुळे धोनीचे करियर संपले अशी चर्चा सुरू झाली होती.
धोनी २०१९च्या वर्ल्ड कपनंतर निवृत्त होईल असे बोलले जात होते. न्यूझीलंडविरुद्ध सेमीफायनल सामन्यात पराभव झाल्यानंतर त्याच्या धीम्या खेळीवरून टीका झाली होती. संघाचे नेतृत्व करताना धोनीने देशाला दोन वेळा विश्वविजेतेपद मिळवून दिले होते. त्यामुळेच धोनीच्या निवृत्तीसंदर्भातील वृत्ताने सोशल मीडियावर वेग घेतला.
गेल्या वर्षी जुलै महिन्यात धोनी टीम इंडियाच्या ब्लू जर्सीमध्ये दिसला होता. तसा धोनी स्वत: सोशल मीडियावर सक्रिय नसतो. पण काल धोनीकडून कोणतीही घोषणा न होता अचानकपणे #DhoniRetires हा शब्द ट्रेडिंगमध्ये आला. अर्थात सोशल मीडियावर सुरू झालेल्या या चर्चेला धोनीची पत्नी साक्षीने पूर्णविराम दिला. साक्षीने स्पष्ट केले की धोनीच्या निवृत्तीसंदर्भातील वृत्त अफवा आहे.
बीसीसीाय किंवा धोनीने यासंदर्भात कोणतीही घोषणा न करता युझर्स सातत्याने #DhoniRetires या हॅशटॅगचा वापर करून ट्वीट करत आहेत. धोनीने इंग्लंडमध्ये झालेल्या वर्ल्ड कप स्पर्धेत ९ सामन्यातील ८ डावात २७३ धावा केल्या होत्या. ज्यात २ अर्धशतकांचा समावेश होता.
बांगलादेशविरुद्ध २००४ मध्ये वनडेत पदार्पण करणाऱ्या धोनीने न्यूझीलंडविरुद्ध अखेरची वनडे खेळली होती. या सामन्यात त्याने ५० धावांची खेळी केली होती. पण भारताचा १८ धावांनी पराभव झाला आणि भारताचे वर्ल्ड कप विजयाचे स्वप्न भंगले. धोनीने २०१४ मध्ये ऑस्ट्रेलियाविरुद्धच्या मालिकेनंतर कसोटी क्रिकेटमधून निवृत्ती घेतली होती.
धोनीने भारताकडून ९० कसोटी, ३५० वनडे आणि ९८ टी-२० सामने खेळले आहे. त्याने कसोटीत ४ हजार ८७६, वनडेत १० हजार ७७३ आणि टी-२०त १ हजार ६१७ धावा केल्या आहेत. कर्णधार म्हणून धोनीने २०० सामन्यात संघाचे नेतृत्व केले. यातील ११० सामन्यात विजय आणि ७४ मध्ये पराभव झाला. धोनी भारताकडून सर्वाधिक सामन्यात कर्णधार म्हणून जबाबदारी पार पाडणारा खेळाडू आहे.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
