भारताचे २० जवान शहीद झाल्याचे वृत्त वाऱ्यासारखे पसरले. त्यानंतर लोकांनी याबाबत शोक व्यक्त केला. चेन्नईच्या संघाचे डॉक्टर असलेले मधू थोटाप्पिलील यांनी एक ट्विट केले होते. या ट्विटमध्ये त्यांनी लिहिले होते की, ” भारताचे जे जवान शहीद झाले, त्यांच्या शव पेटींना पीएम केअर्सचे स्टीकर्स लावले जात आहेत का?” या वादग्रस्त ट्विटनंतर चेन्नईच्या संघाने मधू यांची हकालपट्टी केली आहे. त्याचबरोबर त्यांच्या या ट्विटशी चेन्नई सुपर किंग्स या संघाचा कोणताही संबंध नाही, असेही त्यांनी सांगितले होते.
आता डॉक्टर मधू यांनी एक ट्विट केले आहे. हे ट्विट करून त्यांनी सर्वांची बिनशर्त माफी मागितल्याचे पाहायला मिळत आहे. या ट्विटमध्ये मधू यांनी लिहिले आहे की, ” मी १६ जूनला एक ट्विट केले होते. पण त्यानंतर मला समजले की, या ट्विटमध्ये मी योग्य शब्द वापरलेले नाहीत. माझ्याकडून चुकून ही गोष्ट घडली होती. त्यानंतर मी ते ट्विट डिलीट केले. पण तोपर्यंत माझ्या त्या ट्विटचे स्क्रीन शॉट्स सर्व ठिकाणी व्हायरल झाले होते. माझ्याकडून ते ट्विट चुकून लिहिले गेले होते, त्याबद्दल मी सर्वांची बिनशर्त माफी मागत आहे.”
लडाखच्या गलवान खोऱ्यात सोमवारी चीनच्या लष्करासोबत झालेल्या धुमश्चक्रीत २० भारतीय जवान शहीद झाले तर चीनचे ४३ सैनिक जखमी झाले होते. या घटनेवर संपूर्ण देशातून तीव्र प्रतिक्रिया येत आहेत. भारतीय खेळाडूंनी देखील शहीद जवानांना श्रद्धांजली वाहिली होती. पण आपल्या प्रतिक्रिया देत असताना आयपीएलमधील मधू यांचा तोल गेला. त्याच्याकडून एक वादग्रस्त ट्विट पाहायला मिळाले. त्यानंतर त्याच्यावर संघाकडून हकालपट्टीची कारवाई करण्यात आली होती.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
