खेळाडूंची काळजी सर्वात महत्वाची असल्याचे बीसीसीआयने यापूर्वीच स्पष्ट केले होते. त्यामुळे ज्या देशामध्ये करोना नाही तिथे जर आयपीएल खेळवली गेली तर नक्कीच खेळ आणि खेळाडूंच्यादृष्टीने ते योग्य असेल. त्यामुळे या देशाची ऑफर बीसीसीआ स्वीकारणार का, याकडे सर्वांचे लक्ष लागलेले आहे.
यापूर्वी आयपीएलच्या आयोजनासाठी दोन देशांनी बीसीसीआयला ऑफर दिली आहे. आयपीएलसाठी बीसीसीआयला सर्वात पहिली ऑफर श्रीलंकेने दिली होती. श्रीलंकेमध्ये भारतापेक्षा करोनाबाधितांचे प्रमाण कमी आहे. त्यामुळे बीसीसीआयला आयपीएल खेळवण्यासाठी श्रीलंका हा चांगला पर्याय उपलब्ध असू शकतो. श्रीलंकेनंतर आयपीएलच्या आयोजनासाठी संयुक्त अरब अमिराती पुढे आला होता. दुबईमध्ये आयपीएलचे सामना आयोजित करण्यात येईल, असे त्यांनी सांगितले होते. यापूर्वी २०१४ साली तिथे आयपीएलचे सामना आयोजित करण्यात आले होते. त्यामुळे बीसीसीआय त्यांना पसंती देणार का, हा सर्वात महत्वाचा मुद्दा आहे.
जर विश्वचषक रद्द झाला तर आयपीएल खेळवले जाऊ शकते, नाहीतर बीसीसीआयला जवळपास चार हजार कोटी रुपयांचे नुकसान होऊ शकते. करोना व्हायरसमुळे अजूनही ट्वेन्टी-२० विश्वचषक होणार की नाही, याबाबत संदिग्धता आहे. आयसीसीने याबाबत अजून कोणताही ठोस निर्णय घेतलेला नाही. दुसरीकडे विश्वचषकाच्या आयोजनावर आयपीएलचे भवितव्य अवलंबून असल्याचे म्हटले जात आहे.
आयपीएलच्या आयोजनासाठी सध्याच्या घडीला उत्सुक असलेला देश आहे न्यूझीलंड. काही दिवसांपूर्वीच न्यूझीलंड करोनामुक्त झाल्याचे पाहायला मिळाले होते. त्यामुळे न्यूझीलंडमध्ये आयपीएल खेळवणे सर्वात सुरक्षित आहे. त्यामुळे आता बीसीसीआय या गोष्टीवर विचार करणार का, याची उत्सुकता चाहत्यांना आहे. कारण न्यूझीलंडमध्ये जर आयपीएल खेळवायची झाली तर ती सुरक्षित असेल, पण दुसरीकडे आयोजनाचा खर्च वाढू शकतो, असेही म्हटले जात आहे. त्यामुळे न्यूझीलंड हा करोनामुक्त झालेला असला तरी बीसीसीआयला तिथे आयपीएल खेळवण्याचा खर्च परवडणार का, हे पाहावे लागणार आहे.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
