चंडीगड लॉन टेनिस असोसिएशनच्या (सीएलटीए) कॉम्प्लेक्समध्ये सहकारी खेळाडूचा विनयभंग झाल्याचे समोर आले होते. यात सहभागी पाच ज्युनियर खेळाडू हे वयाने मोठे असल्याचे या मुलीने तक्रारीत म्हटले होते. त्या वेळी हे वय चोरी प्रकरण समोर आले. त्यामुळे वय पडताळणी चाचणी पुन्हा घेण्याचा निर्णय ‘आयटा’ने घेतला आहे. ‘आयटा’चे सरचिटणीस हिरण्मय चटर्जी म्हणाले, ‘यापुढे १२, १४ आणि १६ वर्षांखालील गटाच्या राष्ट्रीय स्पर्धेत मुख्य फेरीत प्रवेश करणाऱ्या टेनिसपटूंची चाचणी (टीडब्लू ३) होणार आहे. त्याचबरोबर ज्युनियर गटाच्या कुठल्याही स्पर्धेत देशाचे नेतृत्व करणाऱ्या टेनिसपटूचीही चाचणी घेण्यात येईल. अशा प्रकारची चाचणी आम्ही पहिल्यांदा घेत नसून, मागेही आम्ही खेळाडूंच्या वैद्यकीय चाचण्या केल्या आहेत. काही कारणास्तव हा उपक्रम थांबला होता. चंडीगड प्रकरणाने प्रसारमाध्यमांचे लक्ष्य वेधून घेतले आणि वयाचा मुद्दा पुन्हा चर्चेत आला. त्यात काही वरिष्ठ खेळाडूंनी वय चोरी प्रकरणाची चिंता व्यक्त केली. त्यामुळे आम्ही पुन्हा या चाचणी करण्याचे पाऊल उचलले.’
चाचणी बंधनकारक नाही
असा एक प्रस्ताव समोर आला होती, की एखाद्या टेनिसपटूची ‘आयटा’मध्ये नोंद झाली की त्याला वय पडताळणी चाचणी बंधनकारक करण्यात यावी. मात्र, चटर्जी यांनी हा प्रस्ताव फेटाळून लावला. ते म्हणाले, ‘सध्या तरी अशी काही मार्गदर्शक तत्त्वे नाहीत. यासाठी जन्माचा दाखला पुरेसा आहे. अर्थात, दाखल्यावर जन्म नोंदणी एका वर्षाच्या आतील असावी. त्यानंतर नोंदणी झालेल्या खेळाडूंना वय पडताळणी चाचणी करण्यास सांगू शकतो.’
महेश भूपतीचा टोमणा
माजी अनुभवी टेनिसपटू महेश भूपती म्हणाला, ‘ही मुलभूत गरज आहे. म्हणून ही चाचणी घेण्याचा निर्णय घेतल्याबद्दल मी कोणासाठी टाळ्या वाजविणार नाही. किंवा चांगले काम केले म्हणून पाठही थोपटणार नाही. अशी पद्धत आपल्याकडे ५० वर्षांपूर्वीच अमलात आणायला हवी होती. गेल्या अनेक वर्षांपासून अनेक मुले या गोष्टीचा सामना करीत आहेत. आशा करतो ही केवळ घोषणा ठरणार नाही. यात काहीतरी शिस्त राखली जाईल. वय चोरी प्रकरणात ही मुले आणि पालक दोघांना जबाबदार धरायला हवे.’
आवश्यक असलेले आणि योग्य दिशेने उचललेले हे पाऊल आहे. सर्वच बोर्डात याची अंमलबजावणी करावी लागेल. पात्रता फेरीत खेळणाऱ्या खेळाडूंचीही चाचणी व्हायला हवी. आणि ही चाचणी विश्वासार्ह अशा लॅबमध्ये व्हायला हवी. जेणेकरून त्यात काही फेरफार होणार नाही. चाचणी स्पर्धा सुरू होण्याच्या आधी स्पर्धा स्थळीच घेतली जावी.
– ज्युनियर डेव्हिस आणि फेड कप स्पर्धेत भारताचे प्रतिनिधित्व करणाऱ्या टेनिसपटूंचीही होणार चाचणी.
– या चाचणीचा खर्च राष्ट्रीय स्पर्धेच्या मुख्य फेरीत दाखल होणाऱ्या टेनिसपटूंकडूनच वसूल केला जाणार आहे.
– ज्युनियर डेव्हिस आणि फेड कपमध्ये देशाचे प्रतिनिधित्व करणाऱ्या खेळाडूंच्या चाचणीचा खर्च ‘आयटा’ करणार आहे.
– पहिल्या चाचणीत खेळाडूला क्लीन चीट मिळाली, तर त्याची दुसऱ्यांदा चाचणी होणार नाही.
महाराष्ट्र टाइम्स आता टेलिग्रामवरही आहे. लेटेस्ट बातम्या आता मोबाइलवरही मिळवा. फॉलो करण्यासाठी करा.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
