आयपीएलच्या मार्गातील आशिया चषक स्पर्धेचा अडसर आता दूर झाला आहे. कारण ही स्पर्धा रद्द करण्यात आली असल्याचे बीसीसीआयचे अध्यक्ष सौरव गांगुली यांनी काही दिवसांपूर्वी सांगितले होते. त्याचबरोबर विश्वचषक रद्द झाला तर आयपीएल होऊ शकते, असे म्हटले जात आहे. पण याबाबत आयसीसीने अजूनही आपला निर्णय घेतलेला नाही. पण ऑस्ट्रेलियाने काही दिवसांपूर्वी विश्वचषक खेळवणे हे जोखमीचे आहे, असे म्हटले होते. त्यामुळे ऑस्ट्रेलिया सध्याच्या घडीला विश्वचषक खेळवण्याचा विचार करत नाही, हे स्पष्ट झाले आहे. पण आयसीसीने विश्वचषक रद्द झाल्याची अधिकृत घोषणा अजूनही केलेली नाही. काही दिवसांमध्ये आयसीसीची बैठक बोलावण्यात आली आहे. या बैठकीत विश्वचषक रद्द करण्याचा निर्णय घेतला जाऊ शकतो, असे काही जणांना वाटत आहे.
आयपीएल खेळवण्यासाठी बीसीसीआय प्रयत्नशील आहे. पण आयपीएल भारतात खेळवायचे की परदेशात, याबाबत बीसीसीआयने काही ठरवल्याचे पाहायला मिळत आहे. कारण ‘न्यूज १८.कॉम’ या हिंदी वेबसाईटने काही दिवसांपूर्वी याबाबत माहिती दिली आहे. त्यांच्या म्हणण्यानुसार एका मीडिया रीपोर्टमध्ये आयपीएल ही संयुक्त अरब अमिरातीमध्ये खेळवण्यात येणार असल्याचे त्यांनी आपल्या बातमीत म्हटले आहे. आयपीएल खेळवण्यासाठी श्रीलंका आणि संयुक्त अरब अमिराती यांनी बीसीसीआयपुढे प्रस्ताव ठेवला होता. यापूर्वी एकदा संयुक्त अरब अमिरातीमध्ये आयपीएलचे आयोजनही करण्यात आले आहे. त्यामुळे आयपीएल संयुक्त अरब अमिरातीमध्ये खेळवण्यात यावा, असा विचार बीसीसीआयने केला असावा. त्याचबरोबर करोना व्हारसमुळे भारतात आयपीएल खेळवणे सोपे नसेल, असेही म्हटले जात होते.
आयपीएलच्या तारखा काय असतील…आयपीएल नेमके कधी खेळवले जाणार, याबाबत जोरदार चर्चा सुरु झाली आहे. कारण आयपीएल खेळवण्यासाठी जवळपास दोन महिन्यांचा कालावधी लागतो. आयपीएल ही २६ सप्टेंबरला खेळवली जाईल आणि अंतिम सामना हा ६ नोव्हेंबरला खेळवला जाईल, असे ‘न्यूज १८.कॉम’ या हिंदी वेबसाईटने आपल्या बातमीमध्ये म्हटले आहे.
Sports News in Marathi: Latest Marathi News on Cricket, Football, Tennis, Hockey & more | Maharashtra Times
