सौरभ शेलार, नगिनदास खांडवाला कॉलेज

पबजीवरील बंदीचा निर्णय स्वागतार्ह असला, तरी आता कोणते नवीन ऑनलाइन गेम्स खेळायचे? सीओडी (कॉल ऑफ ड्यूटी) या गेमसाठी टीम तयार करायची का? यासारख्या प्रश्नांची उत्तरं तरुणांकडून शोधली जात आहेत. व्हॉट्सॲप ग्रुपवर ऑनलाइन गेमिंगच्या चर्चांना जोर आला आहे. एकीकडे या निर्णयामुळे पालकांकडून आनंद व्यक्त केला जातोय, तर दुसरीकडे ऑनलाइन गेम खेळणारे मात्र त्याला पर्याय शोधताना दिसताहेत. पबजीच्या माध्यमातून काही जणांना उत्पन्नाचं साधन मिळाल्यानं या गेमची क्रेझ बऱ्यापैकी वाढली होती. त्यामुळे आता इतर ऑनलाइन गेम्समधून उत्पन्न कसं मिळवायचं याच्या मागे गेमप्रेमी लागले आहेत.

बरेचजण पबजीच्या स्पर्धांना प्रायोजकत्व देऊन गुंतवणूक करायचे. मुंबईतील गणेश शुक्लानं काही दिवसांपूर्वीच ‘द फ्लेंकर्स’ हा स्टार्टअप खेळण्यासाठी सुरू केला होता. ‘या स्टार्टअपमध्ये मी काही लोकांना कामावर ठेवलं होतं. पूर्ण दिवस गेम खेळून पैसे कमवायचे हे त्यांचं काम होतं. या व्यतिरिक्त मी बऱ्याच या स्पर्धा आयोजित करून, त्यांना प्रायोजकत्व द्यायचो. पण, आता हे सगळं थांबलंय. आता आम्ही पबजीला पर्यायी म्हणून ‘कॉल ऑफ ड्यूटी’ या गेममधून उत्पन्न मिळवण्याच्या विचारात आहोत. पण त्यासाठी काही दिवस लागतील. कारण त्या गेमचे खेळाडू तिथे आधीपासूनच आहेत.’ असं गणेश सांगतो.

इतर पर्यायांची चाचपणी

प्रखर गहलोत पूर्ण दिवस पबजी खेळून पैसे कमवायचे. आता ते ‘कॉल ऑफ ड्यूटी’, ‘बॅटल रॉयल थ्रीडी’, ‘फ्री फायर’ यासारख्या गेम्सची चाचपणी करत आहेत. गहलोत म्हणतात की, ‘पबजीला असणारे पर्यायी गेम्स तितके चांगले नाहीत. या गेम्समध्ये हॅकिंगचा धोकाही आहे.’ ऑनलाइन गेम खेळणारा अमित सांगतो की, ‘इतर गेम्सचे ग्राफिक्स तितकेसे चांगले नाहीत. आता बाकीच्या गेम्सना किती पसंती मिळते ते पाहू.’ स्कॉडगोल हा संघ दमदार कामगिरीच्या जोरावर पबजीच्या, नॅशनल इस्पोर्ट्सपर्यंत पोहोचला होता. ‘आमची ‘स्कॉडगोल’ टीम आता इतर गेम्समध्ये तेवढ्याच जिद्दीनं सहभागी होणार आहे’, असं जय गायकवाड या संघाच्या सदस्यानं सांगितलं.

पालकांची जबाबदारी वाढली

मुलांना इतर गेम्स खेळण्यापासून परावृत्त करण्याचं आव्हान पालकांसमोर आहे. गुलाब शर्मा यांचा कॉलेजमध्ये शिकणारा मुलगा, रात्री झोपेतही पबजीविषयी बडबड करायचा. ‘गेमवरील बंदी योग्यच आहे. पण, पबजीला पर्यायी इतर गेम्सही प्लेस्टोअरवर उपलब्ध आहेत. त्यामुळे मुलांना अशा गेम्स खेळण्यापासून परावृत्त करण्याचं आव्हान आमच्यासमोर आहे’, असं शर्मा यांनी सांगितलं. पालकत्व विषयातील तज्ज्ञ असणाऱ्या गीतांजली शर्मा सांगतात, की ‘काही मुलांना या गेमचं व्यसन लागलं होतं. यामुळे अशा परिस्थितीत मुलांना इतर गोष्टींमध्ये जास्तीत जास्त गुंतवून ठेवावं. त्यामुळे या ऑनलाइन गेम्सवरून त्यांचं लक्ष विचलित होईल. पालकांनी स्वतःदेखील ऑनलाइन गेम खेळणं बंद करून, मुलांना जास्तीत जास्त वेळ द्यायला हवा. कॅरम, बुद्धिबळ यांसारख्या घरगुती खेळांमधूनही, मुलांबरोबर चांगल्या पद्धतीने वेळ घालवता येईल.’

पबजीच्या गेम्सचे व्हिडीओ अपलोड करण्यासाठी आम्ही ‘MLA’ हे युट्यूब चॅनल सुरू केलं होत. आता बंदीमुळे आम्ही इतर ऑनलाइन गेम्सचे व्हिडीओ या चॅनलवरून प्रसारित करून, चॅनल सुरू ठेवणार आहोत. सुरक्षेच्या दृष्टिकोनातून बंदीचा निर्णय नक्कीच स्वागतार्ह आहे.

– सुशांत चव्हाण, पब्जी प्लेअर, युट्यूबरशब्दांकन – सौरभ शेलार, (नगिनदास खांडवाला कॉलेज)

Gadget News in Marathi: Computer, Mobile, Auto News in Marathi | Maharashtra Times

LEAVE A REPLY

Please enter your comment!
Please enter your name here