मुंबई टाइम्स टीम

लॉकडाउनचे नियम काही प्रमाणात शिथिल झाले असले, तरीही करोनाच्या वाढत्या प्रादुर्भावामुळे अनेक जण आजही घराबाहेर पडत नाहीत. त्यामुळे नातेवाईक असोत वा मित्र-मैत्रिणी, कुणाशीही प्रत्यक्ष भेटून फारसं बोलणं होत नाही. आपली सुख-दुःखं, मनाचे ताण-तणाव शेअर करण्यासाठी हक्काच्या व्यक्ती सोबत नसल्यामुळे बऱ्याचजणांना या काळात एकटेपणा जाणवताना दिसतोय. या एकटेपणावर मात करण्यासाठी, मनातल्या गोष्टी शेअर करण्यासाठी लॉकडाउनदरम्यान ‘डेटिंग ॲप्सचा’ वापर करणाऱ्या लोकांची संख्या वाढताना दिसतेय. नुकत्याच आलेल्या एका पाहणीच्या अहवालानुसार लॉकडाउनच्या काळात डेटिंग ॲप्सना भेट देणाऱ्या व्यक्तींमध्ये जवळपास ३२ टक्‍क्‍यांनी वाढ झाली आहे.

लॉकडाउनच्या काळात डेटिंग ॲप्स वापरणाऱ्या युजर्समध्ये खूप वाढ झाली आहे. एका डेटिंग ॲपनं यासाठी सर्वेक्षण केलं होतं. त्या सर्वेक्षणातून पुढे आलेल्या माहितीनुसार मागील दोन महिन्यांमध्ये जवळपास दहा लाख नवे युजर्स या ॲपचा वापर करताना आढळून आले आहेत. सुरुवातीला केवळ तरुणवर्ग ही डेटिंग ॲप्स वापरताना दिसत असे. परंतु, लॉकडाउनदरम्यान मात्र प्रत्येक वयोगटातील व्यक्ती या ॲप्सचा वापर करताना दिसताहेत. ॲप लोकांना (युजर्सना) वापरण्यासाठी सोयीस्कर व्हावे यासाठी लॉकडाउनदरम्यान काही डेटिंग ॲप्सनी आपल्या ॲपमध्ये विविध प्रकारच्या फिचर्सचादेखील समावेश केला. ‘करिअर मार्गी लागल्याशिवाय लग्न करणार नाही, असा हल्लीच्या बहुतांश तरूण-तरूणींचा आग्रह असतो. करिअर मार्गी लागेपर्यंत वयाची जवळपास तिशी-पस्तिशी येते. या वयात येईपर्यंत तरुणांना कोणत्याही स्वरुपाची ‘कमिटमेंट’ नको असते. परंतु साथ देणारी कुणीतरी व्यक्ती हवी असते. त्यामुळे दीर्घकाळ नाही टिकली तरी चालतील अशी काही काळापुरती नाती (रिलेशन्स) डेटिंग ॲप्सवर शोधण्याकडे अनेक तरुण-तरुणींचा कल असतो’, असं रिलेशनशिप एक्सपर्ट्स नमूद करतात.

२५ वरुन ४२ टक्क्यांवर

२०१८ मध्ये एका डेटिंग ॲपनं केलेल्या अभ्यासानुसार केवळ २५ टक्के महिला डेटिंग ॲप्सचा वापर करताना दिसून आल्या होत्या. परंतु, लॉकडाउनदरम्यान मात्र पुरुषांबरोबरच महिलासुद्धा डेटिंग ॲप्सचा वापर करताना दिसताहेत. लॉकडाउनदरम्यान केल्या गेलेल्या एका सर्वेक्षणानुसार (अभ्यासानुसार) डेटिंग ॲप्स वापरणाऱ्या महिलांची संख्या जवळपास ४२ टक्के इतकी झाली आहे. डेटिंग ॲप्स महिलांना स्वतंत्रपणे आपला साथीदार निवडायची मोकळीक देतात. डेटिंग ॲप्सतर्फे महिलांना त्यांच्या मनातील भावना व्यक्त करण्यासाठी एक हक्काचा प्लॅटफॉर्म मिळतोय, असं रिलेशनशिप एक्सपर्ट्स म्हणतात.

जगभर प्रभाव

डेटिंग ॲप्सचा वाढता प्रभाव संपूर्ण जगभर दिसून येतोय. मलेशियामध्ये जून आणि जुलैच्या दरम्यान डेटिंग ॲप्सवर जवळपास ४० टक्क्यांहून अधिक लोक सक्रिय झाले. सिंगापूरमध्ये डेटिंग ॲप्सचा वापर करणाऱ्या व्यक्तींची संख्या २८ टक्क्यांनी, अमेरिकेत जवळपास १० टक्क्यांनी तर युकेमध्ये ही संख्या साधारणपणे ४ टक्क्यांनी वाढली आहे. ऑनलाइन मार्केट रिसर्चरच्या माहितीनुसार भारतात २०२० मध्ये साधारण २ कोटी २५ लाख लोक ऑनलाइन डेटिंग ॲप्सचा वापर करताहेत. २०२४ पर्यंत ही संख्या २ कोटी ६८ लाखांवर पोहोचेल असा अंदाज वर्तवला जातोय.

– संकलन

केतकी मोडक (विद्यावर्धिनीज कॉलेज)

Gadget News in Marathi: Computer, Mobile, Auto News in Marathi | Maharashtra Times

LEAVE A REPLY

Please enter your comment!
Please enter your name here