चैतन्य साळगांवकर

करोनाचा प्रादुर्भाव दिवसागणिक वाढत आहे. प्रारंभिक टप्प्यांमध्ये करोनाला घाबरून घरी बसणारे आपण आता परिस्थितीचा स्वीकार करुन जीवनशैलीमध्ये आवश्यक बदल करू लागलो आहोत. अर्थात, हीच न्यू नॉर्मलची सुरुवात आहे. अशाच काही बदलांचा आढावा आजच्या लेखातून घेऊ या.

करोना आणि लॉकडाउनचा फटका अनेक क्षेत्रांना बसला तरीही या कठीण काळातही काही क्षेत्रांनी प्रगती केली. ई-कॉमर्स हे त्यापैकीच एक आहे. फ्लिपकार्ट, अॅमेझॉन, पेटीएम इत्यादी प्रसिद्ध ई-कॉमर्स कंपन्यांनी किराणा सामानावर निरनिराळ्या सवलती आणि ऑफर्स द्यायला सुरुवात केल्या. अनेक मंडळी दुकानात जाऊन किराणा सामान घेण्याऐवजी गेल्या सहा महिन्यांत मोबाइल अॅपद्वारेच किराणा मागवू लागले आहेत. बहुतांश दुकानं बंद होती. तेव्हा ई-कॉमर्स कंपन्यांनी सवलती देऊन आपल्या खपात कमालीची वाढ केली. या क्षेत्रात मागच्या सहा महिन्यांमध्ये उल्लेखनीय वाढ झाली आहे. पुढच्या दहा वर्षांत वाढ दिसून आली असती ती ई-कॉमर्स कंपन्यांनी गेल्या काही महिन्यांमध्ये केलेल्या व्यवसायात दिसून आली आहे.

लॉकडाउन नंतर मनोरंजनाची व्याख्यासुद्धा बदलली. पूर्वीसारखं संपूर्ण कुटुंब एकत्र बसून नेटफ्लिक्स, हॉटस्टार, झी ५ इत्यादी ओटीटी प्लॅटफॉर्म्सद्वारे निखळ मनोरंजनाचा आनंद लुटू लागलं. त्यावर चित्रपट आणि वेब सीरिज बघू लागले. यातून बिंज वॉचची संकल्पना अधिक प्रकर्षाने पुढे आली. नाट्यगृहं आणि सिनेमागृहं बंद असल्यामुळे ओटीटी प्लॅटफॉर्म्सना आपले सबस्क्रायबर्स कैकपटीनं वाढवण्यात यश मिळालं आहे. करोना काळात नेटफ्लिक्सने १६ लाख नवीन सबस्क्रायबर्स मिळवले तर डिजने हॉटस्टारने ५० लाख सबस्क्रायबर्सचा पल्ला गाठला. येत्या काळात अनेक बिग बजेट चित्रपट ओटीटीवरच प्रदर्शित होणार आहेत. तर गेमिंग अॅप्स डाउनलोड करण्याचं प्रमाण ३० टक्क्यांनी वाढलं. म्हणजेच मागील सहा महिन्यांत गेमिंग कंपन्यांनासुद्धा भरघोस नफा झालेला आहे. थोडक्यात काय तर गेल्या सहा महिन्यांमध्ये मनोरंजनाच्या माध्यमांमध्ये आणि स्वरुपामध्ये कमालीचा बदल झाला आहे.

ऑफिसचं काम
करोनाच्या पार्श्वभूमीवर उद्भवलेल्या परिस्थितीत कार्यपद्धतीतही बदल झाला. वर्क फ्रॉम होम या प्रकाराचा स्वीकार केला गेला. ऑफिसमध्ये जाऊन इलेक्ट्रॉनिक पद्धतीनं होणारी हजेरी आता मात्र मोबाइल अॅपद्वारे होऊ लागली. ऑफिसमधल्या डेस्कटॉप्सची जागा लॅपटॉप्सनी आणि टॅबलेट्सने घेतली. निरनिराळ्या ठिकाणी होणाऱ्या मीटिंग्स आणि प्रशिक्षण सत्रं आता गुगल मीट, सिस्को वेबॅक्स, झूम इत्यादी व्हर्च्युअल प्लॅटफॉर्म्सवर होऊ लागली आहेत. करोना पूर्वी ‘झूम’ या प्रसिद्ध मीटिंग अॅप युजर्सची संख्या एक कोटीपर्यंत होती. आता नियमितपणे झूम अॅप्स वापरणाऱ्या युजर्सची संख्या ३० कोटीपर्यंत वाढली आहे. आधी कागदोपत्री होणारे व्यवहार आता डिजिटल स्वरुपात होऊ लागले आहेत.

शिक्षण

शिक्षण क्षेत्रातही न्यू नॉर्मलचा स्वीकार केला गेला. ई-लर्निंग पद्धतीचा अवलंब करण्यात आला. आजच्या घडीला विद्यार्थी गुगल मीट, झूम, सिस्को वेबॅक्स, जिओ मीटसारख्या व्हर्च्युअल क्लासरूम्सच्या मदतीनं शिक्षण घेत आहेत. आता शिक्षक विद्यार्थ्यांना ऑनलाइन शिक्षण देत आहेत आणि शालेय विद्यार्थीसुद्धा घरीच गणवेशात बसून लेक्चर्सना हजेरी लावत आहेत. आता सर्वच शाळा-कॉलेजांनी ई-लर्निंगचा पर्याय स्वीकारला आहे.

कॅशलेस व्यवहार

लॉकडाउनच्या काळात यूपीआय (यूनिफाइड पेमेंट इंटरफेस) वॉलेट युजर्सच्या संख्येतसुद्धा कमालीची वाढ झाली आहे. रोख रकमेचा वापर कमी करून अनेकांनी आता कॅशलेस पेमेंट्सला प्राधान्य देण्यास सुरुवात केली आहे. फळं-भाजी विक्रेते असो किंवा इतर कोणतीही दुकानं असो… तुम्हाला सर्वत्र आता फोन पे, पेटीएम, गुगल पे इत्यादी कंपन्यांचे यूपीआय बेस्ड क्यूआर कोड्स दिसतील. गेल्या वर्षाच्या अखेरीस भारतातील सक्रिय यूपीआय युजर्सची संख्या १० कोटीच्या आसपास होती. आता ती पाच पटीने वाढली आहे. सुमारे ५७ कोटीपर्यंत आकडा वाढला आहे.

चला तर मग मंडळी, आपणसुद्धा आपल्या जीवन शैलीमध्ये काही बदल करून न्यू नॉर्मलचा स्वीकार करू या.

Gadget News in Marathi: Computer, Mobile, Auto News in Marathi | Maharashtra Times

LEAVE A REPLY

Please enter your comment!
Please enter your name here